ZAQATALADA MİLLİ QURTULUŞ GÜNÜ İLƏ BAĞLI SİLSİLƏ TƏDBİRLƏR KEÇİRİLMİŞDİR
İyunun 13-də Milli Qurtuluş günü ilə bağlı Zaqatala rayonunda silsilə tədbirlər həyata keçirilmişdir.
AZƏRTAC xəbər verir ki, bayram tədbirinin iştirakçıları əvvəlcə ümummilli liderimiz Heydər Əliyevin adını daşıyan parka gələrək, ulu öndərin abidəsi önünə gül-çiçək düzmüş, dahi rəhbərin xatirəsini ehtiramla anmışlar.
Sonra rayon rəhbərliyi Zilban çayı üzərində yeni inşa edilmiş körpünün və Zəyəm kəndində yeni tikilmiş tibb məntəqəsinin açılış mərasimlərində iştirak etmişdir. Rayon ictimaiyyətini və kənd sakinlərini əlamətdar gün münasibətilə təbrik edən icra hakimiyyətinin başçısı Asif Əsgərov yeni istifadəyə verilən körpü və tibb məntəqəsinin sakinlərə əsl bayram hədiyyəsi olduğunu nəzərə çatdırmış, rayonda aparılan tikinti-quruculuq işləri barədə məlumat vermişdir.
Sonra Zaqatala şəhərindəki “Qala düzü” İstirahət Mərkəzində “Dünyanın ən böyük azərbaycanlısı” mövzusunda elmi-praktiki konfrans keçirilmiş, Asif Əsgərovun bu mövzuda məruzəsi dinlənilmişdir. Tədbirin əvvəlində ulu öndərin həyat və fəaliyyətindən bəhs edən sənədli film nümayiş etdirilmişdir.
Məruzəçi bildirmişdir ki, dünyanı dahi şəxsiyyətlərin işıqlı əməllərinin nurlandırdığı həqiqətdir. Belə şəxsiyyətlər tarixin ən çətin dövrlərində milli ruhun enerjisindən, xalqın tarixi-siyasi tələbatından, genetik potensialından doğulurlar. Xalq onlara etimad göstərir, öz taleyini etibar edir, bütün məsuliyyət və vəzifələri onların çiyinlərinə qoyur. Ulu öndərimiz Heydər Əliyev Azərbaycan xalqı üçün məhz belə şəxsiyyətdir.
Natiq bildirmişdir ki, Heydər Əliyev Azərbaycanın tarixində rolu olmuş digər şəxsiyyətlərdən məhz ona görə fərqlənirdi ki, o, cəmiyyətimizin bütün sahələrində dərin iz qoymuş, indiki Azərbaycanı yaratmış, yaşatmış, düçar olduğu bəlalardan hifz etmişdir. Öz şərəfli və möhtəşəm fəaliyyəti ilə doğma Vətəninin, xalqının adını əlçatmaz zirvələrə ucaldan dahi şəxsiyyət, ulu öndər Heydər Əliyev daim böyük qürur hissi ilə deyirdi: “Hər bir insan üçün milli mənsubiyyət onun qürur mənbəyidir. Həmişə fəxr etmişəm, bu gün də fəxr edirəm ki, mən azərbaycanlıyam”.
Konfransda “Milli tərəqqimizin memarı”, “Milli qurtuluşumuzun zəfər yolu”, “Böyük ondərin xilaskarlıq missiyası”, “Milyonların taleyinə nur saçan ömür” mövzularında da məruzələr dinlənilmişdir.
Çıxışlarda bir fikir xüsusi vurğulanmışdır ki, ümummilli liderimiz Heydər Əliyevin əsasını qoyduğu tərəqqi, yüksəliş dinamikası Prezident İlham Əliyev tərəfindən XXI əsrin tələblərinə, dövrün, zamanın ruhuna uyğun davam etdirilir.
######
Bölmənin digər xəbərləri
