Bakı, 8 noyabr, AZƏRTAC

8 Noyabr - Zəfər Günü Azərbaycan xalqının milli qürurunun təntənəsinə çevrilən, dövlətimizin qüdrət və gücünün nüfuz və gələcək inkişafı baxımından müstəsna əhəmiyyət kəsb edən tarixi qələbəmizin rəmzidir. Azərbaycanın qəhrəman silahlı qüvvələri tərəfindən darmadağın edilən işğalçı Ermənistanın ordusu noyabrın 8-də ağ bayraq qaldıraraq təslim oldu, bununla da 30 il davan edən işğala son qoyuldu. Qarabağ Zəfəri son üç ildə atılan qətiyyətli, düşünülmüş addımlarla daha da möhkəmləndirildi, suverenliyimiz tam bərpa olundu.

Bunu hərbi ekspert Ədalət Verdiyev AZƏRTAC-a açıqlamasında söyləyib.

Şuşanın işğaldan azad olunması Ermənistanı birgə Bəyanata imza atmağa məcbur etdi

Onun sözlərinə görə, məhz Şuşanın işğaldan azad olunması ilə Ermənistan məğlubiyyətini qəbul edərək üçtərəfli birgə Bəyanata naməlum şəraitdə imza atdı. Bir çoxları Şuşanın azad olunmasından sonra Azərbaycanın üçtərəfli birgə Bəyanatla təsbit edilmiş vəziyyəti dəyişməyə cürət etməyəcəyini düşünürdü. Düşünürdülər ki, Azərbaycan ermənilərin yaşadığı ərazilərdə hər hansı əməliyyat keçirməyə və yaxud da bu ərazilərdə Azərbaycan dövlətinin müvafiq qurum və strukturlarının nəzarətini bərpa etməyə imkan verilməyəcək, beynəlxalq təşkilatlar buna mane olacaqlar. ABŞ, xüsusilə də Qərb ölkələrinin tutduğu mövqe, onların səsləndirdiyi bəyanatlar və proqnozlar bir çoxlarında Azərbaycanın Şuşadan sonra əməliyyatlara davam etməyəcəyinə dair fikirlər formalaşdırmağa imkan vermişdi. Lakin Azərbaycan tərəfi Vətən müharibəsindən sonrakı dövrdə də bütün düşmən təxribatlarına layiqincə cavab verdi və bu proseslərdən Azərbaycanın insan hüquqlarının müdafiə təşkilatları da kənarda qalmadılar. Onlar da 2021-ci ilin sonundan 2022-ci ilin ortalarınadək ərazilərimizin talan edilməsinə və oraya silah-sursat və minaların daşınmasına etiraz əlaməti olaraq aksiyalara başladılar.

Ə.Verdiyev bildirib ki, Azərbaycan Ordusunun hissə və bölmələri Ermənistan silahlı qüvvələrinin Qarabağda qalmaqda davam edən birləşmələrinin ardıcıl təxribatlarına kifayət qədər tutarlı cavab tədbirləri gördülər. Bu cavab tədbirlərinə bəzi region ölkələri və Qərb dairələri etiraz bəyanatları səsləndirir və bununla da Azərbaycana qarşı öz təzyiqlərini davam etdirməyə çalışırdılar. Bu təzyiq cəhdləri heç bir halda Azərbaycanı öz yolundan və istiqamətlərindən, ərazilərinin işğaldan və erməni silahlılarından təmizlənməsi məsələsindən geri çəkilməyə vadar edə bilmədi. Tam əksinə olaraq, Azərbaycan dövləti öz fəaliyyətini kənar qüvvələrin, regiona aidiyyəti olmayan ölkələrin və bəzi üzdəniraq beynəlxalq təşkilatların səsləndirdiyi bəyanatlarla deyil, öz dövlətimizin milli maraqları çərçivəsində planlaşdırdı və həyata keçirdi.

Ali Baş Komandanımızın həyata keçirdiyi məqsədyönlü fəaliyyətlər nəticəsində Azərbaycanın suverenliyi tam bərpa olunub

“Sonrakı dövrdə bir çox ölkələr və təşkilatlar, o cümlədən ABŞ, Avropa İttifaqı, Fransa 30 illik işğal dövründə olduğu kimi, bu müddətdə də vəziyyətin qeyri-müəyyən qalmasında maraqlı idilər. Buna görə də onlar ATƏT-in Minsk qrupunun yenidən fəaliyyətə başlaması üçün bir çox səylər göstərirdilər. Hətta 30 illik danışıqlar prosesinin yenidən bərpası istiqamətində müəyyən addımlar atmışdılar. Danışıqlar prosesinin əsas məntiqi ondan ibarət olurdu ki, Qərb ölkələri ermənilərin Azərbaycanda yaşaya bilməyəcəyi və buna görə də ayrılmasının zəruriliyini ehtiva edən hüquqi prosedurları diplomatik masaya gətirməyə çalışırdı”, - deyə hərbi ekspert vurğulayıb.

Ədalət Verdiyev xatırladıb ki, Qərb təsisatları Azərbaycana və onun Silahlı Qüvvələrinin Ali Baş Komandanı, Prezident İlham Əliyevə qarşı çirkin kampaniyalar həyata keçirirdilər. Onlar öz niyyətlərini praktiki müstəviyə keçirmək üçün bir çox beynəlxalq təşkilatların və informasiya vasitələrinin imkanlarından geniş istifadə edirdilər. Azərbaycanı öz əraziləri üzərində suverenliyini tam bərpa etməsinə imkan vermək istəmirdilər. Nəticə etibarilə əsas məqsəd Azərbaycanı 2020-ci ilin nəticələri ilə məhdudlaşdırmağa məcbur etməkdən ibarət idi.

Dövlətimizin başçısı İlham Əliyev isə bütün fəaliyyəti boyunca nəyi, nə zaman və necə etməli olduğunun ən yaxşı nümunələrini xalqımıza dəfələrlə nümayiş etdirmişdi. O başladığı işlərin heç birini, heç zaman yarımçıq qoymamışdı. Bu dəfə də Ali Baş Komandan İlham Əliyev suverenlik və ərazi bütövlüyü məsələlərində Vətən müharibəsinin nəticələri ilə öz fəaliyyətini məhdudlaşdırmadı. Əksinə, sonrakı üç il ərzində kifayət qədər uğurla həyata keçirdiyi siyasət nəticəsində əvvəlki İkinci Qarabağ savaşındakı qazandığımız nailiyyətləri davam etdirib və 2023-cü ilin sentyabrın 20-də Ali Baş Komandan İlham Əliyevin həyata keçirdiyi məqsədyönlü fəaliyyətlər öz məntiqi sonluğuna çatıb - Azərbaycanın suverenliyi tam bərpa olunub.

Dövlətimizin başçısının uzaqgörən siyasəti nəticəsində Xankəndində Azərbaycanın Dövlət Bayrağı ucaldıldı

Ədalət Verdiyev qeyd edib ki, kənar qüvvələrin bütün təzyiqlərinə, hədələrinə baxmayaraq, dövlətimizin başçısı İlham Əliyev uzaqgörən siyasəti nəticəsində barışmaz prinsipiallıq və qəti iradə nümayiş etdirməklə Xankəndində Azərbaycanın Dövlət Bayrağının ucaldılacağı günü tamamilə tam yaxınlaşdırmağa nail oldu. Azərbaycan tarixinə qızıl hərflərlə yazılacaq nailiyyətlərə imza atan Ali Baş Komandanımız müharibədən sonrakı müddətdə də ölkəmiz üçün mühüm əhəmiyyət kəsb edən bütün məsələləri reallaşdırdı. O, Prezident kimi üzərinə götürdüyü tarixi missiyanı başa çatdırdı. Azərbaycan bir gündən də az müddət ərzində Ermənistan silahlı birləşmələrini tamamilə təslim olmağa məcbur etdi. Dövlətimizin başçısı uzaqgörənliyi və siyasi ustalıq nümayiş etdirərək mürəkkəb münaqişəni kifayət qədər incəliklə, zərgər dəqiqliklə xalqımıza güvənməklə, ondan güc almaqla həll etdi və dünyanı Azərbaycanın haqlı olduğuna inandıra bildi. Ali Baş Komandan yüksək iradə nümayiş etdirərək Azərbaycana qarşı olan və müqavimət göstərən gücləri neytrallaşdırdı və tarixi ədaləti bərpa etdi.

“Bununla da milli lider xüsusiyyətlərini və keyfiyyətlərini özündə birləşdirən Ali Baş Komandan İlham Əliyev müharibədən sonrakı müddətdə tarixi əhəmiyyət kəsb edən və Azərbaycanın suverenliyinin bərpasını təmin edən tarixi missiyanı uğurla başa çatdırdı. Cəmi 23 saat 51 dəqiqə ərzində Ermənistan silahlı qüvvələrinin təslim olması, oktyabrın 15-də isə Xankəndində Prezident İlham Əliyev tərəfindən Azərbaycan Bayrağının ucaldılması tarixi əhəmiyyətinə görə yalnız 44 günlük müharibədə əldə edilən Zəfər Günü ilə müqayisə oluna bilər. 2023-cü ilin sentyabrında Azərbaycanın qazandığı Qələbə siyasi və mənəvi əhəmiyyətinə görə, Zəfər Gününə bərabər olan nailiyyətdir və bu uğur onu tamamlayan tarixi hadisədir.

Hazırda Azərbaycanın Bayrağı bütün suveren ərazilərimiz üzərində dalğalanır. Bu gün həyatını Azərbaycan xalqına həsr etmiş və ölkəmizin ərazi bütövlüyünün bərpa olunması ən böyük arzusu olan Heydər Əliyevin, həmçinin zəngin tariximizin müxtəlif mərhələlərində dövlətimizi qələbədən qələbəyə aparan hökmdarların da ruhu şaddır.

Azərbaycanın əldə etdiyi möhtəşəm qələbənin memarı Ali Baş Komandan İlham Əliyev, onun qəhrəmanları isə Silahlı Qüvvələrimizdir. Allah bütün şəhidlərimizə rəhmət etsin!”, - deyə Ə.Verdiyev fikrini yekunlaşdırıb.