Zəfər Günü ilə əlaqədar Naxçıvan Muxtar Respublikası Ali Məclisinin Bəyanatı qəbul edilib
Naxçıvan, 7 noyabr, AZƏRTAC
Noyabrın 7-də altıncı çağırış Naxçıvan Muxtar Respublikası Ali Məclisinin 2023-cü il payız sessiyasının Zəfər Gününə həsr olunmuş iclası keçirilib.
Naxçıvan Muxtar Respublikası Ali Məclisinin mətbuat xidmətindən AZƏRTAC-ın bölgə müxbirinə bildirilib ki, iclasın gündəliyinə Zəfər Gününün üçüncü ildönümü ilə əlaqədar Naxçıvan Muxtar Respublikası Ali Məclisinin Bəyanatının qəbul olunması, Naxçıvan Muxtar Respublikasının Qida Təhlükəsizliyi Agentliyinin sədrinin təsdiq edilməsi və cari məsələlər daxil edilib.
Əvvəlcə şəhidlərimizin əziz xatirəsi bir dəqiqəlik sükutla yad olunub.
Naxçıvan Muxtar Respublikası Ali Məclisi sədrinin müavini Anar İbrahimov gündəlikdə duran birinci məsələnin müzakirəsi zamanı qeyd edib ki, Zəfərimizin üçüncü ildönümü Xankəndidə hərbi paradla qeyd olunacaq: “Bu tarixi günü Azərbaycan xalqına bağışlayan Prezidentimiz, Ali Baş Komandan İlham Əliyevə daim minnətdarıq. Qərara alındı ki, siyasi qurum olaraq Ali Məclis də bu məsələyə münasibət bildirsin”.
Gündəlikdə duran birinci məsələ ilə bağlı Ali Məclisin deputatları Aidə Cəlilzadə, Elman Cəfərli, Yeganə Məmmədova, Nüsrət Həsənov, Vüqar Abbasov və İsa Məmmədov çıxış ediblər.
Naxçıvan Muxtar Respublikası Ali Məclisi sədrinin müavini Anar İbrahimov gündəlikdə duran birinci məsələ ilə bağlı bildirib ki, Zəfər Gününün üçüncü ildönümü ilə əlaqədar Naxçıvan Muxtar Respublikası Ali Məclisinin Bəyanatının layihəsi hazırlanıb.
Ali Məclisin deputatı Vüsalə Əliyevaya Zəfər Gününün ildönümü ilə əlaqədar Naxçıvan Muxtar Respublikası Ali Məclisinin Bəyanatını səsləndirib.
Bəyanat səsə qoyularaq qəbul edilib. Bəyanatda bildirilir ki, Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə Azərbaycan Silahlı Qüvvələrinin 44 günlük Vətən müharibəsində əldə etdiyi Zəfər Azərbaycan tarixinin şanlı səhifəsi, xalqımızın və dövlətimizin qüdrət rəmzidir. Ümummilli Liderimiz Heydər Əliyevin uzaqgörənlik və müdrikliklə müəyyənləşdirdiyi siyasi xətt Azərbaycanın hərtərəfli inkişafını təmin etmişdir. Ötən 20 ildə İlham Əliyevin rəhbərliyi ilə bu yolun uğurla davam etdirilməsi, xüsusilə ordu quruculuğu sahəsində görülən işlər Azərbaycan Silahlı Qüvvələrini dünyanın ən güclü orduları sırasına çıxarmış, döyüş qabiliyyətini dəfələrlə artırmışdır.
“Zəfər Günü Müzəffər Ali Baş Komandan cənab İlham Əliyevin liderlik məharətinin və onun rəhbərliyi ilə ordumuzun malik olduğu yüksək hərbi-texniki hazırlığın, qəhrəman şəhidlərimizin və qazilərimizin rəşadətinin, ölkəmizdəki xalq-iqtidar birliyinin təntənəsidir. Gələcək nəsillər üçün vətənpərvərlik, milli qürur və birlik nümunəsi olan Zəfər salnaməmiz daim təbliğ olunmalı, öyrənilməli və yaşadılmalıdır”, - deyə bəyanatda qeyd olunur.
Gündəlikdə duran ikinci məsələnin müzakirəsi zamanı Anar İbrahimov qeyd edib ki, cari ilin əvvəlindən Naxçıvan Muxtar Respublikasında struktur islahatlarına start verilib: “Struktur islahatları müxtəlif sahələri əhatə edib və bu prosesin məqsədi müxtəlif sahələrdə idarəetmənin optimallaşdırılması, mərkəzi strukturlara uyğunlaşdırmaq, səmərəliliyin artırılması və pərakəndəliyin aradan qaldırılması olub. Artıq müxtəlif sektorlarda bu proseslər başlanılıb və davam etdirilməkdədir. Əminik ki, bu prosesin sonunda Naxçıvan Muxtar Respublikasında çevik, səmərəli və şəffaf idarəetmə sistemi qurulacaq. Bu da təbii ki, möhtərəm Prezidentimizin bütövlükdə islahat konsepsiyasının tərkib hissəsidir”.
Qida təhlükəsizliyindən danışan A.İbrahimov bildirib ki, bu sahə muxtar respublikada ölkədən fərqli olaraq vahid mərkəzi icra hakimiyyəti strukturunda deyil, bir neçə strukturlarda həyata keçirilirdi. Bu da strateji sahə olan qida təhlükəsizliyi sahəsində vahid dövlət siyasətinin hazırlanıb həyata keçirilməsində bir sıra problemlər yaradırdı. “Bu səbəbdən Naxçıvan Muxtar Respublikası Qida Təhlükəsizliyi Agentliyi yaradılıb. Ali Məclis sədrinin 3 noyabr 2023-cü il tarixli müvafiq fərmanı ilə agentliyin fəaliyyətinin təmin edilməsi məqsədi ilə onun əsasnaməsi və strukturu təsdiq edilib, hökumətə isə agentliyin fəaliyyətinin təmin edilməsi ilə bağlı müvafiq tapşırıqlar verilib. Hazırkı mərhələdə agentliyin idarə edilməsi prosesinin təmin olunması gündəlikdədir. Agentlik mərkəzi icra hakimiyyəti orqanı statusunda olan təsisatdır, yəni onun rəhbəri muxtar respublika hökumətinin üzvü statusundadır”, - deyə o vurğulayıb.
Nəsirov Səfəralı Üzeyir oğlunun Naxçıvan Muxtar Respublikası Qida Təhlükəsizliyi Agentliyinin sədri vəzifəsinə təsdiq edilməsi ilə əlaqədar Naxçıvan Muxtar Respublikası Ali Məclisinin qərar layihəsi səsə qoyulub və o, Naxçıvan Muxtar Respublikası Qida Təhlükəsizliyi Agentliyinin sədri vəzifəsinə təsdiq edilib.
Sonra cari məsələlər müzakirə olunub. İclasda verilən təkliflər aidiyyəti qurumlara göndərilmək üçün qeydə alınıb.
Bölmənin digər xəbərləri
