MƏDƏNİYYƏT
1-Cİ BAKI BEYNƏLXALQ YARADICILIQ FOTO FESTİVALI AÇILMIŞDIR
Noyabrın 1-də 1-ci Bakı Beynəlxalq yaradıcılıq foto festivalı (“Ayna-2002”) açılmışdır.
Mədəniyyət Nazirliyi, Azərbaycan Dövlət Rəssamlıq Akademiyası, Fransanın Bakıdakı səfirliyinin və başqalarının dəstəyi ilə Azərbaycan Fotoqraflar Birliyi tərəfindən ölkəmizdə ilk dəfə təşkil olunmuş festivalda 10 gün ərzində respublikamızın, habelə Rusiya, ABŞ, İtaliya, Latviya fotoqraflarının 1000-ə qədər işi nümayiş etdiriləcək.
Festivalın ilk sərgisi V.Səmədova adına sərgi salonunda açılmışdır. Burada 28 fotoqrafın müxtəlif mövzulara, o cümlədən Azərbaycanın neft tarixinə həsr olunmuş 100 qədər foto-əsəri nümayiş etdirilirdi.
Tanınmış elm, mədəniyyət və din xadimlərinin, ictimaiyyətin nümayəndələrinin iştirak etdikləri açılış mərasimində Rəssamlar İttifaqının sədri Fərhad Xəlilov festival haqqında məlumat verdi, iştirakçıları təbrik edərək onlara uğurlar arzuladı.
Mədəniyyət naziri Polad Bülbüloğlu çıxış edərək, Azərbaycan Prezidenti Heydər Əliyevin rəhbərliyi altında həyata keçirilən neft strategiyasının uğurlarını əks etdirən foto-əsərləri yüksək dəyərləndirdi.
Azərbaycan Fotoqraflar Birliyinin sədri Rafiq Qəmbərov ölkəmizin foto sənətindən söhbət açdı, tədbir iştirakçılarına öz təşəkkürünü bildirdi.