2030-cu ilə qədər Türkiyənin turizmdən 120 milyard dollar gəlir əldə etməsi gözlənilir
Bakı, 22 sentyabr, AZƏRTAC
Türkiyə artıq öz ucuz ölkə imicini geridə qoyub. Proqnozlara görə, Anadolu mədəniyyət turlarının satışlarının artması nəticəsində 2030-cu ilə qədər ölkəyə 100 milyon turist gəlməsi, ölkənin 120 milyard dollar gəlir əldə etməsi gözlənilir.
AZƏRTAC “Anadolu”ya istinadla xəbər verir ki, bunu Dünya Qardaş Şəhərlər Turizm Dərnəyinin baş katibi Hüseyin Baraner bildirib. O qeyd edib ki, son 5 ildə bir turistə düşən orta xərcin 800 dollardan 1200 dollara yüksəlməsi müşahidə edilir.
H.Baraner əlavə edib ki, Türkiyə turizm siyasəti etdiyi dəyişikliyin bəhrəsini alıb. Bu səbəbdən Türkiyənin turizm sektorunda əhəmiyyətli artım olacaq.
Ekspertlərin fikrincə, bu il Türkiyəyə 300 min alman turist gəlib və 2024-cü ildə bu rəqəm 15-20 faiz artacaq.
Bundan başqa Almaniya Turizm Sənayesi Assosiasiyasının prezidenti Sören Hartman Türkiyənin turizm siyasətində mədəni turizmin prioritetləşdirilməsinin böyük faydalar verdiyini, yüksək keyfiyyətlə birləşərək zəngin turistlər üçün daha cəlbedici olduğunu qeyd edib.
Bölmənin digər xəbərləri
