Yaponiyada sunami xəbərdarlığı elan olunub
Pekin, 8 iyun, AZƏRTAC
Filippinin cənubunda baş verən güclü zəlzələdən sonra Yaponiyada sunami xəbərdarlığı elan edilib.
AZƏRTAC xəbər verir ki, Yaponiyanın Meteorologiya Agentliyi ölkənin cənub sahillərində, o cümlədən İbaraki və Okinava prefekturalarında sunami təhlükəsi ehtimalı olduğunu bildirib. Sahilə yaxınlaşan dalğaların hündürlüyünün bir metrə çata biləcəyi gözlənilir.
Agentliyin nümayəndəsi Kiyomoto Masaşi jurnalistlərə bildirib ki, 2023-cü ilin dekabrında təxminən eyni arenada baş verən 7,6 bal gücündəki zəlzələdən sonra Yaponiya sahillərində sunami müşahidə olunmuşdu. O, afterşokların davam etdiyini nəzərə alaraq, hazırkı zəlzələdən sonra hündür dalğaların yarana biləcəyini deyib.
Agentlik əhalini sahildən uzaq durmağa, dənizdə olanları dərhal quruya çıxmağa çağırıb. Sunami xəbərdarlığının hava limanlarının və dəmir yollarının fəaliyyətinə təsiri olmayıb.
Qeyd edək ki, iyunun 7-də gecə saatlarında Filippinin cənubundakı Mindanao adasında 7,8 bal gücündə zəlzələ olub. İlkin məlumatlara görə məktəblər, xəstəxanalar və yaşayış evləri daxil olmaqla 37 binaya ziyan dəyib. Azı 8 nəfər həlak olub, təxminən 200 nəfər xəsarət alıb. ABŞ-nin Milli Okean və Atmosfer Administrasiyası Filippin, İndoneziya, Malayziya və Yaponiya daxil olmaqla regionda sunami təhlükəsinin olduğunu açıqlayıb.
Bölmənin digər xəbərləri
