30 APREL UKRAYNADA MATƏM GÜNÜ ELAN EDİLMİŞDİR
AZƏRTAC-ın xüsusi müxbiri xəbər verir ki, Ukrayna Prezidenti Viktor Yuşşenko Qara dəniz səmasında Mi-8 vertolyotunun və Cənubi Çin dənizində “Naftoqaz-67” gəmisinin qəzaya uğraması nəticəsində çoxsaylı insan tələfatı ilə əlaqədar aprelin 30-nu ölkədə matəm günü elan etmişdir.
Ukrayna dövlətinin başçısı vertolyot qəzası nəticəsində həlak olmuş insanların yaxınlarına və doğmalarına da başsağlığı vermişdir.
Xatırladaq ki, martın 22-də Cənubi Çin dənizində Lantau adası ilə Syanqanın (Honkonq, ÇXR) yeni əraziləri arasındakı boğazda Ukraynanın “Naftoqaz” gəmisi Çinin “Yaoxay” iritonnajlı yük gəmisi ilə toqquşmuşdur. Ukrayna gəmisində 4 metr uzunluğunda yarığın açılması nəticəsində o, bir neçə dəqiqə içində suya qərq olmuşdur. Gəmidəki 25 nəfərdən yeddi heyət üzvü, o cümlədən altı Ukrayna vətəndaşı və bir Çin vətəndaşı xilas edilmiş, qalanları isə həlak olmuşdur.
Ukraynaya məxsus Mi-8 vertolyotu isə martın 28-də Qara dənizə düşmüşdür. Hadisə yerində 19 nəfər həlak olmuş, bir nəfər isə bir neçə saat sonra aldığı xəsarətlərdən keçinmişdir.
Bölmənin digər xəbərləri
