Hirkan Milli Parkının zəngin biomüxtəlifliyi alman tədqiqatçıların marağını cəlb edir FOTO VİDEO
Lənkəran, 22 may, İlkin Adıyev, AZƏRTAC
UNESCO-nun Ümumdünya İrs Siyahısına daxil edilən Hirkan Milli Parkının zəngin biomüxtəlifliyi avropalı tədqiqatçıların maraq dairəsindədir.
Araşdırmalar göstərir ki, ölkə ərazisində mövcud olan 4500 bitki növündən təxminən 2000-i Hirkan Milli Parkında müşahidə edilir. Orta hesabla hər 1000 hektarda 32 bitki növünün qeydə alındığı Hirkan Milli Parkı, zəngin flora və faunası ilə seçilir.
AZƏRTAC-ın bölgə müxbiri xəbər verir ki, milli parkın bu zənginliyi Almaniyadan olan tədqiqatçı xanım Sandy Kastnerin diqqətini cəlb edərək, onu buraya gətirib.
“Bu milli parkla bağlı məlumatları internetdən əldə etdim. Təbiət və onunla bağlı elmlər sahəsində çalışanların əksəriyyəti Azərbaycandakı milli parklar haqqında ümumi məlumata malikdir. Lakin belə parkların sadəcə mövcudluğuna dair məlumatlar asanlıqla əldə olunsa da, onların haqqında ətraflı və praktiki bilgilərə çıxış çox vaxt çətinlik yaradır. Fikrimcə, bu sahədə əsas məsələ təhsildir. Təhsil cəmiyyətin bu dəyərləri mənimsəməsi və qəbul etməsi üçün açardır. Xüsusilə də gənclər nəyi və niyə qorumağın vacib olduğunu anlamalıdırlar, çünki bu, bizim hamımızın məsuliyyət daşıdığı bir dəyərdir”, - deyə almaniyalı tədqiqatçı bildirib.
Hirkan Milli Parkı təkcə Azərbaycan üçün deyil, ümumilikdə, region üçün nadir və böyük əhəmiyyət daşıyan təbii sərvət sayılır. Parkın bu qədər önəmli olmasının əsas səbəblərindən biri, burada çoxsaylı endemik və relikt bitki növlərinin qorunub saxlanmasıdır.
Milli parkın baş elmi işçisi Həbib Rəhimovun sözlərinə görə, parkı ziyarət edən alman tədqiqatçılar burada rast gəldikləri bitki növlərinə böyük maraq göstərirlər. Onlar bildirirlər ki, bu nadir növlərin bir çoxuna Almaniyada rast gəlinmir: “Almaniyalı tədqiqatçılar burada əldə etdikləri ilkin bilgiləri genişləndirmək və gələcək elmi-tədqiqat işlərini davam etdirmək məqsədilə yenidən Hirkan Milli Parkına qayıtmaq niyyətində olduqlarını deyirlər. Bu da bir daha sübut edir ki, Hirkanın təbii zənginlikləri təkcə yerli deyil, beynəlxalq elmi ictimaiyyət üçün də böyük maraq doğurur. Hirkan Milli Parkında avropalı tədqiqatçıların xüsusilə maraq göstərdiyi ağaclardan biri də Hirkan şümşadıdır. Hərçənd ki, hazırda qurumuş vəziyyətdə görünür, amma bu ağacın xüsusiyyətlərindən biri müəyyən zaman keçdikdən sonra özünü təbii şəkildə bərpa etmək qabiliyyətinə malik olmasıdır. Bu nadir xüsusiyyət onu həm elmi tədqiqatlar, həm də biomüxtəlifliyin qorunması baxımından son dərəcə qiymətli edir. Hirkan şümşadı təkcə regionun deyil, həm də qlobal miqyasda təbiət elmləri sahəsində çalışan mütəxəssislərin diqqətini üzərinə cəmləyən nadir relikt növlərdən biridir” , - deyə baş elmi işçi əlavə edib.
Qeyd edək ki, 40 min hektardan artıq sahəni əhatə edən Hirkan Milli Parkı 2023-cü ildə UNESCO-nun Ümumdünya İrs Siyahısına daxil edilib. Bu park Azərbaycanın bu nüfuzlu siyahıya daxil edilən ilk təbiət ərazisi olmaqla, ölkənin təbii irsinin beynəlxalq səviyyədə tanınmasının mühüm göstəricisidir. Bu status parkın qorunmasına və elmi-turizm potensialının inkişafına da əlavə imkanlar yaradır.
Bölmənin digər xəbərləri
