Fərid Bağırov: İnklüziv təhsildə incəsənətin uşaqlara təsiri çox böyükdür VİDEO
Bakı, 26 may, Gülay Nəzərova, AZƏRTAC
Müasir dövrdə incəsənət təkcə yaradıcılıq sahəsi deyil, eyni zamanda fərdin sosial, emosional və psixoloji inkişafına təsir göstərən mühüm vasitə kimi çıxış edir. Rənglərin, səslərin, hərəkətlərin dili ilə danışan incəsənət, fərdin özünü tanıması, cəmiyyətə inteqrasiyası və mənəvi zənginliyə qovuşması üçün əvəzsiz bir vasitədir. Bu maraq təkcə istedadlı və yaradıcı gəncləri deyil, eyni zamanda, inklüziv təhsilə cəlb olunmuş, müxtəlif bacarıq və inkişaf xüsusiyyətlərinə malik uşaqları da əhatə edir. Onlar üçün incəsənət terapiya, özünüifadə yolu, güvən mənbəyinə çevrilir.
Məhz bu səbəbdən Azərbaycanda inklüziv təhsilin incəsənətlə birləşdiyi nümunələr böyük önəm daşıyır. Azərbaycan İncəsənət Məktəbinin təsisçisi Fərid Bağırov AZƏRTAC-ın müxbiri ilə söhbətində ölkədə gənclərin aktyorluq sənətinə olan marağının artmasından, inklüziv təhsilin əhəmiyyətindən və gənclərin yaradıcı potensialının inkişaf etdirilməsinin zəruriliyindən danışıb.
Onun sözlərinə görə, Azərbaycan İncəsənət Məktəbinin əsas məqsədi gənclərin istedadını üzə çıxarmaq, onların yaradıcı potensialını dəstəkləmək və gələcəyin peşəkar sənətkarlarını yetişdirməkdir. Məktəbdə klassik teatrla yanaşı, müasir performans texnikaları da tədris olunur ki, bu da tələbələrə həm yerli, həm də beynəlxalq səviyyədə rəqabətə davamlı olmaq imkanı yaradır.
Söhbət zamanı Fərid Bağırov Azərbaycan İncəsənət Məktəbində yaradılan inklüziv qrupun fəaliyyətindən və uşaqlara verdiyi imkanlardan danışıb: “Yaradılan bu qrup inklüziv təhsil prinsiplərinə əsaslanır. Qrupda təhsil alan uşaqlara fərdi yanaşma tətbiq edilir, onların bacarıqları üzə çıxarılır və özlərini ifadə etmək imkanı yaradılır. Həmçinin bu fəaliyyətlər uşaqlar arasında dostluq münasibətlərinin formalaşmasına, sosial inteqrasiyanın güclənməsinə də töhfə verir. İnklüziv təhsil modeli sayəsində müxtəlif bacarıqlara malik gənclər birgə öyrənir, birgə yaradırlar. Bu, həm onların özlərini cəmiyyətin tamhüquqlu üzvü kimi hiss etməsinə, həm də digər tələbələrdə empatiya və sosial məsuliyyət hissinin formalaşmasına şərait yaradır”.
Fərid Bağırov inklüziv qrupla keçdiyi dərslər zamanı müşahidələrini bölüşərək bildirib ki, bu dərslər uşaqların yalnız özünüinkişaf bacarıqlarını deyil, həm də kommunikasiya, özünəinam və özünüifadə qabiliyyətlərini sürətlə inkişaf etdirməyə təkan verir. Onların daxili aləmi zəngin, emosional duyum tərzi daha dərindir. İnanıram ki, inklüziv qrupda təhsildə olan uşaqların əldə etdikləri biliklər gələcəkdə onlara böyük uğur və nailiyyətlər gətirəcək. İncəsənət bütün dünyanı birləşdirən bir dəyərdir. İnklüziv təhsildə incəsənətin uşaqlara təsiri çox böyükdür. Onlar burada aktyorluğun sirlərini mənimsəyir, musiqi dinləyir, ifaçılıq bacarıqlarını təkmilləşdirir, rəsm çəkirlər. Bu zaman onların özünüifadə və ünsiyyət bacarıqları daha sürətlə inkişaf edir. Bu da onların ətrafdakılarla daha rahat ünsiyyət qurmasına səbəb olur. Çünki onlar səssiz olsalar da, çox dərin bir dünyaları var”.
Burada olarkən bir daha əmin olduq ki, dövlətin diqqət və dəstəyi sayəsində inklüziv qruplarda təhsil alan gənclərə öz bilik və bacarıqlarını üzə çıxarmaq üçün geniş imkanlar yaradılıb. Dövlət tərəfindən həyata keçirilən proqramlar, layihələr və dəstək mexanizmləri gənclərə öz istedadlarını üzə çıxarmaq, yaradıcılıq potensiallarını inkişaf etdirmək üçün mühüm resurslar təqdim edir. Bu imkanlar yalnız sənət bacarıqlarının təkmilləşdirilməsi ilə məhdudlaşmır, həm də gənclərin sosial inteqrasiyasını gücləndirir, onlarda empatiya, özünəinam və məsuliyyət hissi yaradır.
İnklüziv təhsil mühitində isə bu dəstək daha da vacib olur, çünki burada müxtəlif bacarıqlara malik uşaqlar və gənclər bərabər şəraitdə yaradıcılıqla məşğul olaraq, həm öz potensiallarını kəşf edir, həm də cəmiyyətə daha sıx inteqrasiya olurlar.
Bölmənin digər xəbərləri
