Oğuzlu fermer: Dövlət Proqramının qəbul olunması və xüsusən taxılçılıqla bağlı tezislər bizdə gələcəyə inamı artırır VİDEO
Oğuz, 25 iyun, AZƏRTAC
On doqquz yaşında 2 hektar taxıl əkməklə kənd təsərrüfatında ilk addımlarını atan oğuzlu fermer Fidail Məmmədov bu gün 36 yaşına qədəm qoyub və əkin sahələrini 600 hektara çatdırıb.
AZƏRTAC-ın bölgə müxbiri xəbər verir ki, bu əkin sahələrinin 200 hektarı fermerin şəxsi torpaqlarıdır. Kənd təsərrüfatının inkişafına dair yeni qəbul olunmuş Dövlət Proqramında taxılçılığın inkişaf etdirilməsi ilə bağlı tezis və müddəaların yer alması Fidail Məmmədovun son illər gözlədiyi ən şad xəbərlərdən birincisidir. Fermer taxılçılıq sahəsi üzrə gələcəkdə ölkə birincisi olmaq əzmindədir və dövlətin fermerlərə yaratdığı bütün imkanlardan səmərəli istifadə etməyi qarşısına məqsəd qoyub.
Oğuzun Top kənd sakini Fidail Məmmədov hər il biçin dövründə ikiqat bayram sevinci yaşayır. O, bir neçə ildir ki, ad gününü taxıl sahəsində qeyd edir. Həmin gün arpa biçininə başlayır.
Biz də onunla birlikdə əkin sahələrinə baş çəkib həm taxıl zəmilərində yetişən məhsulun vəziyyətini, həm də kombaynların iş rejimini izlədik.
“Taxılçılıq çətin və şərəfli bir sahədir. Prezidentin də müşavirədə vurğuladığı, Dövlət Proqramında da qeyd olunduğu kimi, ölkəmizdə ərzaq təhlükəsizliyi istiqamətində hər bir vətəndaş səylə çalışmalı, idxal asılılığından xilas olmalı, ixracatçıya çevrilməliyik. Mən də gələcək işlərimi bu istiqamətdə qurmağa çalışıram” - deyə Fidail bildirir. Müsahibimiz deyir ki, taxılçılığa başladığı gündən bu yana öz fermer təsərrüfatını qurmaq, genişləndirmək üçün dövlətin dəstəyini hiss edib, güzəştli kreditlər vasitəsilə kombaynlar alıb, texnikaya sahib olub, iri taxıl anbarları inşa edib. Yeni Dövlət Proqramı fermerin qarşısında daha böyük hədəflər qoyur ki, buna nail olmaq üçün dövlət-vətəndaş-fermer tərəfdaşlığı çərçivəsində nail olmağa yetərincə mənbələr və əsaslar var.
Fermer əlavə edir ki, builki qeyri-sabit hava şəraitinə baxmayaraq taxıl zəmilərində məhsul boldur. O, arpa sahələrindən 40-45 sentner məhsul götürmək əzmindədir.
Biz əkin sahəsində olarkən Oğuz Dövlət Aqrar İnkişaf Mərkəzinin Bitkiçilik sektorunun müdiri Şərif Şahhüseynov da buraya gəlir. Onunla da söhbətimizi bu istiqamətdə davam etdiririk.
“Oğuz zəngin əkinçilik ənənələri olan bir rayondur və keçmişdə olduğu kimi, bu gün də çətin hava şəraitinə baxmayaraq fermerlərimiz sahələrdən məhsul əldə edə biliblər. Hazırda Oğuzda 17 min 138 hektar sahədə payızlıq taxıl bitkiləri əkilib. Onun 9833 hektarı buğda, 7305 hektarı isə arpadır. Hava şəraiti imkan versə, biçini qısa müddətdə başa çatdırmağı planlayırıq, çünki maşın və texnika sarıdan hələlik ciddi problemimiz yoxdur”, - deyən sektor müdiri əlavə edir ki, sudan səmərəli istifadə etmək, əsasən damcılama, pivot suvarma su sistemlərinin tətbiqinə üstünlük vermək vacibdir. Hazırda rayonda 90 hektar sahə pivot suvarma sistemləri ilə suvarılır, həmçinin digər bir təsərrüfatda 50 hektarda bu il ilk dəfə sprinklerlə suvarma tətbiq olunub.
Şərif Şahhüseynov bildirir ki, Əlicançay hövzəsində ölkəmizin ən iri su anbarlarından biri inşa olunur. Bu layihənin icrası başa çatandan sonra Oğuz və Şəki rayonları ərazisində 11-12 min hektar əkinləri suvarmaq, eləcə də yaşayış məntəqələrini su ilə təmin etmək mümkün olacaq.
Sektor müdiri Azərbaycanda kənd təsərrüfatının inkişafı istiqamətində həyata keçirilən yeni dövlət siyasətini aqrar sektorda mühüm dönüş mərhələsi kimi qiymətləndirir. Xüsusilə “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın təsdiqlənməsi taxılçılıq sahəsində yeni inkişaf modelinin formalaşdırılmasına zəmin yaradır.
“Eyni zamanda, yerli istehsal potensialının genişləndirilməsi vasitəsilə ölkənin ərzaq təhlükəsizliyinin daha da möhkəmləndirilməsi əsas hədəflərdən biri kimi müəyyən olunub. Proqram çərçivəsində bölgələrdə taxılçılıq ənənələrinin yenidən bərpası və sahənin inkişafı üçün bir sıra konkret tədbirlərin həyata keçirilməsi nəzərdə tutulur. Prioritet istiqamətlərdən biri müasir suvarma sistemlərinin tətbiqinin genişləndirilməsi, su resurslarından daha səmərəli istifadə edən innovativ texnologiyaların təşviqi və əkin sahələrinin məhsuldarlığının artırılmasıdır”, - deyən Şərif Şahhüseynov vurğulayıb ki, bu addımlar istehsalın dayanıqlığını təmin etməklə yanaşı, məhsul keyfiyyətinin yüksəldilməsi baxımından da əhəmiyyət daşıyır.
Müsahibimiz qeyd edib ki, fermerlərin yeni texnologiyalara çıxış imkanlarının genişləndirilməsi məqsədilə subsidiya, güzəştli kredit və digər maliyyə dəstəyi mexanizmlərinin tətbiqi də nəzərdə tutulur: “Bununla yanaşı, yüksək məhsuldarlığa malik toxum sortlarından istifadənin artırılması, aqrotexniki xidmətlərin gücləndirilməsi və müasir kənd təsərrüfatı texnikalarının tətbiqi də əsas istiqamətlər sırasında yer alır. Taxıl silolarının və logistika infrastrukturunun inkişaf etdirilməsi də Dövlət Proqramının mühüm komponentlərindən biridir. Bu tədbirlər məhsul itkilərinin minimuma endirilməsinə, saxlama imkanlarının genişləndirilməsinə və fermerlərin bazarlara daha rahat çıxış əldə etməsinə şərait yaradacaq”.
Xatırladaq ki, Dövlət Proqramına əsasən, buğda məhsuldarlığının ixtisaslaşmış rayonlarda 50 sentner/hektara çatdırılması, buğda istehsalı həcminin ölkə üzrə 20 faiz artırılması planlaşdırılır.
Şərif Şahhüseynovun qənaəti belədir ki, yeni Dövlət Proqramı aqrar sektorda məhsuldarlıq, ixrac və ərzaq təhlükəsizliyi üzrə yeni mərhələnin əsasını qoyacaq. Bu, ilk növbədə, kənd yerlərinin sosial rifahını gücləndirəcək və regionların balanslı inkişafına xidmət edəcək. Digər tərəfdən, məhsuldarlığın artırılması ölkədə ərzaq təhlükəsizliyinin və ərzaq bolluğunun daha da gücləndirilməsinə xidmət edəcək, kənd təsərrüfatı məhsullarının əlçatanlığı təmin olunacaq.
Müxbir - Rasim İslamoğlu
Bölmənin digər xəbərləri
