Azərbaycan nümayəndə heyəti BMT-nin Statistik və Geoməkan İnformasiyasının inteqrasiyası üzrə Qlobal Forumunda iştirak edir VİDEO
Nyu-York, 5 avqust (AZƏRTAC). Avqustun 4-də BMT-nin Nyu-Yorkdakı baş ofisində Statistik və Geoməkan İnformasiyasının inteqrasiyası üzrə Qlobal Forum öz işinə başlamışdır.
AZƏRTAC-ın Vaşinqton bürosunun verdiyi məlumata görə, iki gün davam edəcək forumda Azərbaycan Respublikasının Dövlət Torpaq və Xəritəçəkmə Komitəsinin sədri Qərib Məmmədovun rəhbərliyi ilə ölkəmizin nümayəndə heyəti də iştirak edir.
Azərbaycan nümayəndə heyəti BMT-nin Qlobal Geoməkan Məlumatlarının İdarəolunması üzrə Ekspertlər Komitəsinin avqustun 6-dan 8-dək keçiriləcək 4-cü iclasında da təmsil olunacaqdır.
Forumun əsas məqsədləri statistik və geoməkan informasiyasının inteqrasiyası üzrə ümumi təsəvvürün formalaşdırılması, “Post-2015” İnkişaf Gündəliyi kimi informasiya müzakirələrində birgə yanaşmaya nail olunması, texniki imkanların inkişafı üçün istiqamətin birgə müəyyənləşdirilməsi, statistik geoməkan platforması mexanizminin zəruriliyinin dəstəklənməsidir.
Forumda 150-dən artıq nümayəndə, o cümlədən müxtəlif ölkələrin müvafiq qurumlarının rəhbərləri iştirak edirlər.
Nümayəndə heyətimiz Azərbaycan Respublikası Prezidentinin 2012-ci il 29 dekabr tarixli Fərmanı ilə təsdiq edilmiş “Azərbaycan 2020: gələcəyə baxış” İnkişaf Konsepsiyasının əsas hədəflərini diqqətə çatdıraraq qarşıya qoyulan məqsədlərə nail olmaq üçün mühüm alətlərdən biri kimi geoməkan və statistika məlumatlarının inteqrasiyasını xüsusi vurğulayıb, bu istiqamətdə Dövlət Torpaq və Xəritəçəkmə Komitəsində aparılan işlər barədə müfəssəl məlumat verib. Bununla yanaşı, forum iştirakçıları interaktiv xəritə interfeysi, Dövlət Torpaq və Xəritəçəkmə Komitəsi tərəfindən hazırlanaraq qurumun geoserverində yerləşdirilmiş Regionların İnkişafı Analitik İnformasiya Sistemi barədə məlumatlandırılıblar. Azərbaycan Milli Məkan Məlumatları İnfrastrukturunun prototipi kimi nəzərdə tutulan bu sistem orqanlararası mübadiləyə əsaslanaraq fundamental bir platforma kimi daha da genişləndiriləcək.
Forum çərçivəsində hazırda həmin sistem üçün suvarılan torpaqların uçotuna dair hazırlanan yeni modul barədə fikir mübadiləsi aparılıb.
Tədbirdə bir çox ölkələrin müvafiq sahələrə məsul dövlət qurumlarının rəhbərləri ilə aparılan fikir mübadiləsində ölkəmizdə bütün sahələr üzrə, o cümlədən geoməkan və statistik informasiyanın inteqrasiyası sahəsində görülmüş işlər məmnunluqla qarşılanıb, Azərbaycanın bu sahədə bir sıra beynəlxalq təşkilatlarda çox ciddi mövqeyə malik olduğu xüsusi vurğulanıb.
Qeyd edək ki, müasir dövrdə dövlət və özəl sektorlarda qərarların qəbulu proseslərində istinad kimi istifadə olunan informasiyaların başlıca təminatçıları geoməkan və statistika mütəxəssisləridir. Milli və qlobal çağırış və problemlərin mürəkkəbliyinin artması ilə müvafiq proseslərin iqtisadi, sosial və ətraf mühiti əhatə edən tərkib hissələri arasında qarşılıqlı əlaqələrin dərk edilməsi zərurəti həlledici amilə çevrilir. Hazırkı qlobal cəmiyyətdə qərarların qəbul edildiyi əsasların uyğunluğunun artırılması üçün geoməkan informasiyası və statistik informasiyanın əlaqələndirilməsinin zəruriliyi və dəyəri aşkar şəkildə qəbul olunur. Rastlaşdığımız başlıca çağırış bu inteqrasiyaya səmərəli və ardıcıl yolla nail olmağın ən uğurlu üsulunu müəyyənləşdirməkdir.
BMT-nin Statistika Komissiyası və Qlobal Geoməkan Məlumatlarının İdarəolunması üzrə Ekspertlər Komitəsi geoməkan və statistika informasiyasının milli və qlobal səviyyədə idarə olunması və səmərəli inteqrasiyası sahəsində çağırışların cavablandırılması zərurətini qəbul edərək bu sahədə həllərin tapılması məqsədilə əməkdaşlıq etməyə razılaşıblar. Onlar ən yaxşı təcrübələrin yayılması və inkişaf etdirilməsi, statistika və geoməkan mütəxəssisləri icmalarını bir yerə toplamağın yolu kimi beynəlxalq konfransın təşkili və statistik və geoməkan informasiyasının inteqrasiyası üçün qlobal standart olaraq statistika-məkan platformasının yaradılması işinin dəstəklənməsi məqsədilə Statistik və Geoməkan İnformasiyasının İnteqrasiyası üzrə Ekspert Qrupunun yaradılması barədə razılığa gəlmişlər.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
