Bakı, 20 oktyabr, AZƏRTAC

20 oktyabr - Ümumdünya Statistika Günü Bakıda təntənəli surətdə qeyd olunub. Mərasimdə mərkəzi icra orqanlarının rəhbərləri, Milli Məclisin deputatları, Azərbaycan Milli Elmlər Akademiyasının, ali təhsil müəssisələrinin nümayəndələri, beynəlxalq təşkilatların Azərbaycandakı ofislərinin təmsilçiləri iştirak ediblər.

AZƏRTAC xəbər verir ki, mərasimdə çıxış edən Dövlət Statistika Komitəsinin sədri Tahir Budaqov  BMT-nin Baş Assambleyasının 2015-ci il 20 oktyabr tarixini “Daha təkmil statistika - daha yaxşı həyat” şüarı altında Ümumdünya Statistika Günü elan edilməsi ilə əlaqədar qəbul etdiyi qətnamə barədə məlumat verib. Bildirib ki, Azərbaycanın statistika işçiləri üçün bu günün əhəmiyyətli olması həm də ondan ibarətdir ki, 2015-ci ildə ölkəmizin rəsmi statistikasının 95 yaşı tamam olur.

Azərbaycanın statistika sisteminin tarixindən danışan komitə sədri qeyd edib ki, uzun inkişaf yolu keçmiş statistika sisteminin inkişafı ümummilli lider Heydər Əliyevin Azərbaycana rəhbərlik etdiyi dövrdə daha geniş vüsət almağa başlayıb. Dövlət Statistika Komitəsinin yeni, müasir tələblərə cavab verən inzibati binası və 40-dan çox rayon və şəhərdə statistika idarələrinin binaları məhz Ulu Öndərin hakimiyyəti dövründə tikilib.

Müstəqil Azərbaycana rəhbərliyi dövründə də statistikanın inkişafı Heydər Əliyevin daim diqqətində olduğunu deyən T.Budaqov qeyd edib ki, həmin dövrdə dövlət statistika sistemində islahatların aparılmasına dair ardıcıl olaraq iki beşillik Dövlət Proqramı həyata keçirilib.

“Statistikanın inkişafı Prezident İlham Əliyevin ölkəyə rəhbərliyi dövründə də uğurla davam etdirilir. Yerli statistika orqanlarının işçilərinin iş şəraitinin yaxşılaşdırılması və maddi texniki bazalarının təkmilləşdirilməsi məqsədilə 25 rayon və şəhər statistika idarəsi üçün müasir inzibati binalar inşa olunub, rəsmi statistikanın inkişafı ilə bağlı daha üç Dövlət Proqramı qəbul edilib. Bu proqramlar ölkə statistikasının yeni inkişaf mərhələsinə təkan verib. Beynəlxalq əlaqələr genişlənib, 13 ölkənin statistika оrqanları ilə statistika sahəsində əməkdaşlığa dair sazişlər imzalanıb”, - deyə komitə sədri bildirib.

Sonra Ümumdünya Statistika Günü ilə bağlı videoçarx nümayiş etdirilib.

Dövlət Statistika Komitəsi sədrinin müavini Rauf Səlimovun “Azərbaycanda rəsmi statistika: tarixi, bu günü və inkişaf perspektivləri” adlı məruzəsi dinlənilib.

Mərasimdə “Statistika xəbərləri” elmi-praktik jurnalının təqdimatı olub.

İqtisadiyyat və sənaye naziri Şahin Mustafayev bildirib ki, statistika ölkələrin iqtisadi, demoqrafik, sosial, ekoloji və digər sahələrindəki vəziyyətinin güzgüsü olmaqla burada hərtərəfi təhlillərin aparılmasında, meyillərin aşkar edilməsində və bu istiqamətdə görüləcək işlərin müəyyənləşdirilməsində müstəsna əhəmiyyətə malikdir. Eyni zamanda, ölkənin dayanıqlı sosial-iqtisadi inkişafını təmin edən məqsədli Dövlət proqramları, konsepsiyalar və strategiyaların həm hazırlanmasında, həm də icrasının qiymətləndirilməsində statistik göstəricilərin əhəmiyyəti danılmazdır.

Ölkədə statistikanın həm elmi araşdırmalar, həm də praktiki təcrübə baxımından böyük ənənələrə malik olduğunu deyən nazir qeyd edib ki, Azərbaycan statistika məktəbi Sovet İttifaqında ən yaxşılardan biri hesab olunurdu. Müstəqilliyini bərpa etdikdən sonra Azərbaycanda xalqımızın ümummilli lideri Heydər Əliyevin hakimiyyətə qayıdışı ilə bütün sahələrdə olduğu kimi, statistika sahəsində də ciddi islahatlara start verilib və ölkəmizdə milli statistika sisteminin inkişafının yeni dövrü başlanılıb. Bu sahənin böyük əhəmiyyəti nəzərə alınaraq, 1994-cü ildə “Statistika haqqında” Azərbaycan Respublikasının Qanunu qəbul edilib ki, bu da statistikanın möhkəm və təkmil qanunvericilik bazasının yaradılmasını təmin edib.

“Ölkəmizdə rəsmi statistikanın daha da inkişaf etdirilməsi məqsədilə dövlət statistika sistemində islahatların aparılması və rəsmi statistikanın təkmilləşdirilməsinə dair bir neçə Dövlət Proqramının, o cümlədən hazırda icrada olan “2013-2017-ci illərdə Azərbaycan Respublikasında rəsmi statistikanın inkişafı Dövlət Proqramı”nın təsdiq edilməsi, Prezident İlham Əliyevin bu sahəyə verdiyi əhəmiyyətin göstəricisidir. Statistikaya göstərilən bu diqqət, şübhəsiz ki, milli statistik göstəricilər sisteminin əhatəliliyinin, dəqiqliyinin və keyfiyyətinin daha da yüksəldilməsində öz töhfəsini verir”, - deyə Ş.Mustafayev bildirib.

Mərasimdə çıxış edən mədəniyyət və turizm naziri Əbülfəs Qarayev qeyd edib ki, bu gün Azərbaycanda iqtisadi islahatlar, ölkə iqtisadiyyatının müasirləşdirilməsi, onun enerji sektorundan asılılığının azaldılması, respublikada sosial sahədə həyata keçirilən yeniliklər və islahatlar sözsüz ki, bu proseslərin düzgün əks olunmasına və statistik hesabatlara yeni yanaşmaların tətbiq edilməsinə xüsusi əhəmiyyət verilir. Azərbaycanın son illərdə beynəlxalq aləmdə əldə etdiyi çox nüfuzlu yerə nəzər saldıqda statistika sahəsində də yeniliklər və beynəlxalq standartlara uyğunlaşma prosesinin çox uğurla həyata keçirildiyini görərik. Son dörd il ərzində Mədəniyyət və Turizm Nazirliyi Dövlət Statistika Komitəsi ilə birgə Ümumdünya Turizm Təşkilatının tövsiyə etdiyi sistemin üzərində statistikanın qurulması və statistik hesabatların hazırlanması istiqamətində apardığı iş artıq ənənəyə çevrilib.

BMT-nin İnkişaf Proqramının Azərbaycandakı nümayəndəliyinin rəhbəri Antonius Bruk isə qeyd edib ki, ölkələr və təşkilatlar Dayanıqlı İnkişaf Məqsədlərinin həyata keçirilməsinə başladıqlarına görə etibarlı və vaxtlı-vaxtında olan statistika və göstəricilər çox mühümdür. Bu səbəbdən, bu il Ümumdünya statistika günü “Daha təkmil statistika - daha yaxşı həyat” şüarı altında keçirilir.

O bildirib ki, BMT Dövlət Statistika Komitəsi ilə əməkdaşlığın davam etdirilməsinə hazırdır. Təşkilat cəmiyyətin bütün iştirakçıları tərəfindən məlumatlı və dəlillərə əsaslanan qərarların qəbul edilməsi üçün vacib olan Dayanıqlı İnkişaf Məqsədləri üzrə qlobal qiymətləndirmə prosesinə inteqrasiya olunmasında Azərbaycan hökumətinin dəstəklənməsində əsas rol oynayır.

Milli Məclisin iqtisadi siyasət komitəsinin sədri Ziyad Səmədzadə bildirib ki, statistika olmasa Azərbaycan iqtisadiyyatının təhlili aparıla bilməz. Statistika ölkənin inkişafının ayrı-ayrı mərhələlərində müxtəlif seqmentlər üzrə nöqsanların araşdırılması və sistemli təhlilin aparılması üçün çox vacibdir.

“Azərbaycan müstəqilliyini əldə etdikdən sonra ölkədə sözün həqiqi mənasında milli statistika formalaşdırılıb. Son iyirmi ildə Azərbaycan özünün milli statistikasını yaradıb və bu prosesdə beynəlxalq təşkilatların çox mühüm rolu olub. Hazırda Azərbaycanda dünyəvi standartlara cavab verən statistik məcmuələr hazırlanır. Azərbaycan dövlətinin statistik göstəriciləri ölkədə görülən böyük işlərə adekvat olmalıdır. Bu adekvatlığı da təmin etmək üçün bütün təşkilatlar üz məsuliyyətini dərk etməlidir”, – deyə Z.Səmədzadə qeyd edib.

Çıxış edən Azərbaycan Respublikası Prezidenti Administrasiyasının sosial siyasət məsələləri sektorunun müdiri Mehman Tağıyev bildirib ki, statistika sahəsi keyfiyyətcə fərqlənən kütləvi xarakterli ictimai və sosial-iqtisadi prosesləri kəmiyyət tərəfdən öyrənən, cəmiyyətin həyatına aid hadisələri əks etdirən sahə kimi təqdim olunur. Lakin statistika fəaliyyəti əslində cəmiyyətin inkişafında yalnız passiv iştirak etmir, həm də onun gedişatında və sürətləndirilməsində mühüm rol oynayır. Müasir zamanda rəsmi statistika hər bir demokratik cəmiyyətin informasiya sistemində əvəzolunmaz komponentdir. O, idarəetmə orqanlarını iqtisadi, demoqrafiq, sosial və ekologiya sahələrdə peşəkarcasına və qərəzsiz olaraq hazırlanmış məlumatlarla təmin edir. Bu baxımdan statistika hakimiyyətin demək olar ki, bütün qərarlarının, rəsmi qəbul olunan sənədlərin əsasını təşkil edir və sosial-iqtisadi inkişaf proseslərinin idarəolunmasının çox mühüm alətidir.

“Son iyirmi ildə Azərbaycanda həyata keçirilən iqtisadi islahatlar, ölkəmizin dünya iqtisadi sisteminə inteqrasiyası, beynəlxalq əlaqələrin genişləndirilməsi digər sahələrdə olduğu kimi statistika sahəsində də proqressiv dəyişikləri zəruri edib. Statistika fəaliyyətini həyati əhəmiyyətini nəzərə alaraq ölkəmiz müstəqillik əldə etdikdən sonra dövlət tərəfindən bu sahəyə xüsusi diqqət və qayğı göstərilib. Bu illərdə Azərbaycanın milli statistikası keyfiyyətcə yeni inkişaf mərhələsinə daxil olub”, - deyə M.Tağıyev qeyd edib.

Nazirlər Kabinetinin iqtisadiyyat şöbəsinin müdiri Şahin Sadıqov və Azərbaycan Dövlət İqtisad Universitetin (ADİU) rektoru, professor Ədalət Muradov isə ölkəmizdə statistikanın tarixindən, bu sahənin vacibliyindən və dövlət üçün əhəmiyyətindən danışıblar.

Dünya Bankının Azərbaycan üzrə ölkə meneceri xanım Larisa Leşçenko qeyd edib ki, Azərbaycanda statistika sahəsi son 20-25 ildə böyük transformasiya dövrü keçib. O, Dünya Bankının Dövlət Statistika Komitəsi ilə əməkdaşlıq əlaqələrindən danışıb və hər iki qurumun məlumat mübadiləsinin daha da genişləndirilməsində maraqlı olduğunu bildirib.

Mərasimdə Prezident İlham Əliyevin 2015-ci il 17 oktyabr tarixli Sərəncamı ilə Azərbaycanda statistika işinin təşkili sahəsində səmərəli fəaliyyətlərinə görə təltif edilmiş şəxslərə orden və medallar təqdim olunub. Həmçinin, ayrı-ayrı dövlət orqanlarında statistika ilə məşğul olan şəxslər Dövlət Statistika Komitəsinin Fəxri fərmanları ilə təltif ediliblər.

Sonda Dövlət Statistika Komitəsinin kollektivi adından dövlətimizin başçısı İlham Əliyevə müraciət qəbul olunub.