AZƏRTAC xəbər verir ki, dekabrın 28-də Azərbaycan Dövlət Pedaqoji Universitetində (ADPU) bu ali təhsil ocağının 85 illik yubileyinə həsr olunmuş təntənəli yığıncaq keçirilmişdir.

Milli Məclisin deputatlarının, Təhsil Nazirliyi rəhbərliyinin, bir sıra Dövlət Komitələri sədrlərinin, Bakının bir sıra rayonları icra hakimiyyəti başçılarının, müxtəlif universitetlərin nümayəndələrinin iştirak etdiyi tədbiri təhsil naziri Misir Mərdanov açaraq, kollektivə Azərbaycan Respublikasının Prezidenti İlham Əliyevin təbrikini çatdırmışdır. Nazir məlumat vermişdir ki, dövlətimizin başçısı dekabrın 26-da imzaladığı sərəncamlarla Azərbaycanda təhsilin inkişafındakı xidmətlərinə görə universitetin 2 əməkdaşını “Şöhrət” ordeni, 16 nəfəri “Tərəqqi” medalı ilə təltif etmiş, 2 nəfərə “Əməkdar elm xadimi”, 19 nəfərə “Əməkdar müəllim” fəxri adı vermişdir. Bundan əlavə, nazirliyin kollegiyasının qərarı ilə bir qrup əməkdaş “Qabaqcıl təhsil işçisi” döş nişanına və Fəxri fərmanlara layiq görülmüşdür.

Misir Mərdanov “Şöhrət” ordenlərini Əbdül Əlizadəyə və Mirzəli Murquzova, habelə fəxri adların vəsiqələrini sahiblərinə təqdim etmişdir.

Təhsil ocağının tarixi, keçdiyi yol, bugünkü fəaliyyəti haqqında univertsitetin rektoru, AMEA-nın müxbir üzvü, əməkdar elm xadimi Yusif Məmmədovun məruzəsi maraqla dinlənilmişdir. Natiq bildirmişdir ki, bu ali pedaqoji təhsil ocağı Azərbaycan Xalq Komissarları Sovetinin sədri Nəriman Nərimanovun 1921-ci il 26 avqust tarixli dekreti əsasında fəaliyyətə başlamışdır. Rektor ali məktəbin formalaşması və inkişafında xidməti olmuş ziyalıları, onların bu məqsədlə həyata keçirdikləri tədbirləri, buranı bitirmiş görkəmli məzunları xatırlatmış, respublikamızda ali pedaqoji məktəblərin yaradılmasında baza rolu oynamasını qeyd etmişdir. Xüsusi vurğulamışdır ki, ali pedaqoji təhsilin bayraqdarı olan ADPU-nun 85 illik tarixinin son 30 ili bilavasitə ümummilli liderimiz Heydər Əliyevin adı və fəaliyyəti ilə bağlıdır. Ulu öndər buraya 5 dəfə gəlmiş, professor-müəllim və tələbə kollektivinə çox dəyərli tövsiyələr vermiş, hər bir əməkdaşın arzusu, istəyi ilə maraqlanmışdır. Onun tövsiyələri universitetdə təhsil-tərbiyənin səmərə və keyfiyyətinin yüksəlməsində, qəbul imtahanlarında obyektivlik və ədalətin bərqərar edilməsində, nöqsanların aradan qaldırılmasında, gənclərin ictimai fəallığının artırılmasında, yüksək səviyyəli elmi və elmi-pedaqoji kadr hazırlığında həlledici rol oynamışdır.

Bu gün universitetin 10 fakültəsində 8 minə yaxın tələbə, magistraturada 10 istiqamət, 33 ixtisas üzrə 512 magistr təhsil alır, 9 aspirant, 56 dissertant, 24 doktorant elmin müxtəlif sahələri ilə bağlı araşdırma aparır. 50 kafedrada 56 elmlər doktoru, professor, 450 nəfərə yaxın elmlər namizədi, dosent, AMEA-nın 3 müxbir üzvü, Rusiya Təhsil Akademiyasının 2 əcnəbi üzvü çalışır.

Hazırda ADPU-da maddi-texniki bazanın möhkəmləndirilməsi, ali pedaqoji təhsilin məzmununun təkmilləşdirilməsi, professor-müəllim və tələbə kollektivi arasında mənəvi-psixoloji mühitin sağlamlaşdırılması istiqamətində ciddi islahatlar aparılır. Kadr hazırlığı sahəsində xüsusi rolu olan 49 tədris, 4 elmi tədqiqat laboratoriyası, 12 fənn kabinəsi, 10 rəsm, 5 tədris emalatxanası, zoologiya muzeyi, zəngin kitabxana, 500 yerlik 3 oxu zalı, 200 yerlik tələbə yeməkxanası, poliklinika, 11 kompyuter sinfi, internet şəbəkəsi fəaliyyət göstərir.

Məruzədə təhsil ocağının beynəlxalq əlaqələrindən, mətbu orqanlarından, aparılmış elmi tədqiqatların nəticələrindən, bu nəticələrin işıq üzü görməsi üçün atılmış addımlardan da söz açılmışdır.

ADPU-nun keçdiyi yolu, hazırkı fəaliyyətini, ümummilli liderimiz Heydər Əliyevin buraya gəlişini əks etdirən sənədli film göstərilmişdir.

Dövlət İqtisad Universitetinin rektoru, Milli Məclisin elm və təhsil məsələləri daimi komissiyasının sədri Şəmsəddin Hacıyev, Nərimanov və Səbail rayon icra hakimiyyətlərinin başçıları Abdin Fərzəliyev və Sahib Ələkbərov, Dövlət Torpaq və Xəritəçəkmə Komitəsinin sədri Qərib Məmmədov və başqaları kollektivi əlamətdar yubiley münasibətilə təbrik etmişlər.

Yığıncaq iştirakçıları adından Azərbaycan Respublikasının Prezidentinə müraciət qəbul edilmişdir.