REGİONLAR
Bu ildən Gəncə Tibb Kollecində yeni fənlər tədris ediləcək
Gəncə, 7 oktyabr, Elcan Məmmədov, AZƏRTAC
Gəncə Tibb Kollecində yeni ixtisasların açılması, yaradılan yüksək şərait orta tibb işçilərinə olan ehtiyaca görə qəbul sayının artmasına, eyni zamanda, tələbələrin beynəlxalq səviyyədə müasir texnologiyalardan yararlanaraq tibbi təhsil almağa marağını artırır. Bu il kollecdə 155 nəfər Tibb bacısı işi (qardaşı), 55 nəfər Mamalıq işi, 25 nəfər stomatologiya, 25 nəfər əczaçılıq, 25 nəfər tibbi profilaktika, 25 nəfər isə laborator diaqnostika ixtisasları üzrə tələbə adını qazanıb.
Bu sözləri AZƏRTAC-ın bölgə müxbirinə müsahibəsində Gəncə Tibb Kollecinin direktoru Mehman Rzayev deyib.
O bildirib ki, hazırda 7 ixtisas üzrə 901 tələbənin təhsil aldığı müəssisədə korpuslar əsaslı təmir edilib, dam örtüyü yenilənib. Kollecdə mərkəzi istilik sistemi bərpa olunub, idman meydançası yaradılıb. Tədrisin keyfiyyətinin artırılması məqsədilə maddi-texniki bazası da yaxşılaşdırılıb. Yeni smart lövhələr quraşdırılıb, tədris otaqları internetlə təmin olunub ki, bu da dərs prosesində tələbələrin dərsləri daha yaxşı qavramasına, ehtiyac olarsa, beynəlxalq təcrübələrdən də yararlanmalarına şərait yaradır. Tələbələrin praktik məşğələləri keçməsi və əyani şəkildə biliklərə yiyələnməsi üçün də imkanlar xeyli yaxşılaşdırılıb.
“Hazırda müasir laboratoriyalarımız var. Ortopedik stomatologiya, laborator diaqnostika, əczaçılıq ixtisasları üzrə təhsil alan tələbələrimiz müasir avadanlıqlarla təchiz edilən laboratoriyalardan faydalana biləcəklər. Yaxın vaxtlarda bu siyahıya daha bir laboratoriya da əlavə olunacaq. Burada tibbi bacarıqlar praktik olaraq robot-maniken üzərində həyata keçiriləcək,” - deyə Mehman Rzayev əlavə edib.
Gəncə Tibb Kollecinin direktoru bu ildən yeni təhsil proqramına əsasən Daxili xəstəliklərdə tibb bacılığı, Ailə təbabəti, Onkologiyada tibb bacılığı, Reproduktiv sağlamlıq və ailə planlaşdırılması, Tibbi biokimya, Xarici dildə işgüzar və akademik kommunikasiya, Əməyin mühafizəsi, Sanitar maarifləndirmə, Epidemiologiya və biostatistika, Tibbi sanitar mikrobiologiya kimi bir sıra yeni fənlərin də tədris ediləcəyini bildirib.
Həmçinin Gəncə Tibb Kollecində iki yeni dərsliyin hazırlandığını da diqqətə çatdırıb. Bunlardan biri yeni tədris olunacaq “Xarici dildə işgüzar və akademik kommunikasiya” dərs vəsaitidir. İkinci dərslik isə “Təcili təxirə salınmaz tibbi yardım və xəstələrə qulluğun əsasları” adlanır. Bu kitabda kollecin yaranma tarixindən bu günə qədər əhatə edən dövr və təcili təxirə salınmaz tibbi yardım, xəstələrə qulluğun qaydaları geniş əhatə olunub.
Kollecin direktoru onu da bildirib ki, tələbələrin asudə vaxtının təşkili, sağlamlıqlarının qorunması üçün fitnes zal yaradılıb. Yaxın vaxtlarda yüksəksürətli internet və kompüterlərə malik müasir kafe kitabxananın tikintisinə başlanılması da nəzərdə tutulur.