Musiqi məktəbində Xalq artisti Fatma Mehrəliyevanın 95 illiyi qeyd olunub
Bakı, 11 dekabr, AZƏRTAC
Bakı Şəhər Mədəniyyət Baş İdarəsinin təşkilatçılığı ilə 17 nömrəli uşaq musiqi məktəbində Xalq artisti Fatma Mehrəliyevanın 95 illiyinə həsr olunmuş tədbir keçirilib.
İdarədən AZƏRTAC-a bildirilib ki, tədbiri məktəbin nəzəriyyə şöbəsinin müəllimi Günay Məmmədova görkəmli sənətkarın həyat və yaradıcılığına həsr olunmuş mühazirə ilə açıb. O, xanəndənin keçdiyi keşməkeşli yollardan, yaradıcılıq fəaliyyətinin zirvəsi sayılan “Kəsmə şikəstə”dən danışıb.
Tədbirdə xanəndənin repertuarından “Kəsmə şikəstə”, “Nazlana-nazlana”, “Azərbaycan maralı”, “Ahu kimi”, “Getmə dayan”, “Unuda bilmirəm” kimi mahnılar məktəbin xanəndə sinfinin müəllimi Sevda Xəlilova və şagirdləri tərəfindən səsləndirilib.
Konsertdə müəllimlərdən ibarət Xalq Çalğı Alətləri Ansamblı solistləri məharətlə müşayiət ediblər.
Sonda Fatma Mehrəliyevaya həsr olunmuş videoçarx nümayiş olunub və izləyicilər onun məlahətli səsini dinləyiblər.
Bölmənin digər xəbərləri
