Şəkidə IV Beynəlxalq Qafqaz Motofestivalı başlayır
Bakı, 10 avqust, AZƏRTAC
Azərbaycanın ən qədim şəhəri yenidən öz qapılarını dünyanın dörd bir yanından gələn baykerlərin üzünə açır.
AZƏRTAC xəbər verir ki, avqustun 28-dən 30-dək Şəkidə IV Beynəlxalq Qafqaz Motofestivalı təşkil olunacaq. Festival “Harley Davidson” “Baku HOG Azerbaijan”, Şəki Şəhər İcra Hakimiyyəti, Mədəniyyət və Turizm Nazirliyi, Gənclər və İdman Nazirliyi və Çingiz Mustafayev Fondunun birgə təşkilatçılığı ilə keçiriləcək.
Hər il olduğu kimi bu il də baykerlərin motosikletlərdə göstərdikləri əsrarəngiz şoular hamını heyran edəcək. Şəkidə çıxış edəcək dünya şöhrətli “Lady Qaqa”, “Elvis Presli”, “Beatles”, “Kiss” qruplarının “tribute”ları isə festivala xüsusi rəng qatacaq. Unudulmaz gecə yerli müğənnilərin ifası, xarici DJ-lərin coşğun musiqiləri ilə davam edəcək.
Qafqaz Motofestivalı çərçivəsində sərgi-yarmarka da təşkil ediləcək. Sərgi-yarmarkada motobrendlər, moto və digər aksessuarlar, həmçinin Azərbaycan mədəniyyətini əks etdirən əşyalar nümayiş olunacaq. Festival iştirakçılarına xüsusi turlar vasitəsilə gün ərzində şəhərin tarixi abidələri ilə tanışlıq imkanı yaradılacaq.
Motofestivala motobrendlər, motoklublar, motomədəniyyət aləmi ilə maraqlananlar, ümumiyyətlə, maraqlı gün keçirmək istəyən hər kəs qatıla bilər. Festival Şəki Olimpiya Kompleksində təşkil olunacaq. Festivalda iştirak pulsuzdur.
Motofestival barədə məlumatları Facebook və İnstagram (@CaucasusMotofest) səhifələrindən də izləmək mümkündür.
Bölmənin digər xəbərləri
