® Praqada 18-ci Beynəlxalq “Caspian Investment Forum Prague 2024” işə başlayıb
Bu gün Praqada 18 məruzəçinin iştirakı ilə 18-ci Beynəlxalq “Caspian Investment Forum Prague 2024” işə başlayıb.
Bu barədə “Caspian Energy Czechia”nın İdarə Heyətinin sədri Zaur Qədirov bildirib.
Bu, indiyədək keçirilən forumlar arasında rekord sayda məruzəçisi olan forumdur. İştirakçılar qeydiyyatdan sonra Praqa Konqres Mərkəzinin zalında təqdim olunan incəsənət və kitab sərgisi ilə tanış olublar.
Azərbaycan Yazıçılar Birliyinin, Britaniya Poeziya Cəmiyyətinin, Avropa Yazıçılar Konqresinin üzvü, “Natavan” cəmiyyətinin yaradıcısı, Azərbaycanın Əməkdar artisti, tanınmış şairə Leyla Begimin, eləcə də Azərbaycan əməkdar incəsənət xadimi Bəhram Bağırzadənin kitabları forum iştirakçılarında böyük təəssürat yaradıb.
Forumun moderatoru olan Çexiyadakı “Financial Chain Corporation”ın regional meneceri Teymur Axundovun salamlama nitqindən sonra forum öz işinə başlayıb. Azərbaycanın Çexiyadakı səfiri Adış Məmmədov, Türkiyənin Çexiyadakı səfiri Egemen Bağış, “Caspian Energy Club”ın sədri və qrupun baş icraçı direktoru Telman Əliyev və “Financial Chain Corporation”ın idarəedici tərəfdaşı, “Caspian Energy Club Czechia”nın İdarə Heyətinin sədri Zaur Qədirov tədbir iştirakçılarını salamlayıb və belə bir tədbirin ölkələr arasında iqtisadi əlaqələrin inkişafına əhəmiyyətini vurğulayıblar.
“Hüquqi mühit: Aİ-nin mürəkkəb normativ-hüquqi bazasında oriyentasiya və onun sərhədləri daxilində fəaliyyət göstərən bizneslərə təsirinin anlaşılması” adlanan birinci sessiyada məruzəçi qismində Çexiya Sənaye və Ticarət Nazirliyinin Xarici İqtisadi Siyasət Departamentinin direktoru Martin Postpisil, iqtisadçı, məsləhətçi, Çexiya-Ukrayna Ticarət və Sənaye Palatasının keçmiş sədri Petr Krumphanzl və Xarici İnvestisiya Assosiasiyasının sədri Kamil Blazek çıxış ediblər.
Qeyd edək ki, tədbirin məqsədi ölkələr arasında işgüzar əlaqələrin genişləndirilməsi, investisiya və əməkdaşlıq üçün yeni imkanların yaradılması, həmçinin müxtəlif ölkələrin biznes mühiti haqqında fikir mübadiləsinin aparılmasıdır. Həm dövlət qurumlarının nümayəndələrinin, həm də biznes mühitinin potensial tərəfdaşlarının iştirakı ilə keçirilən forumun təşkilatçıları “Joint Bridges” və “Caspian Energy Club Czechia”, platin sponsoru isə “Financial Chain Corporation”dır. Foruma rəsmi dəstək Azərbaycanın Çexiyadakı səfirliyi və Türkiyənin Çexiyadakı səfirliyi tərəfindən göstərilir.
Forumun sponsorları “Energazer”, “Philips” və “Evintel”dir.
“Caspian Energy Club” dünyanın 50 ölkəsindən 5 000-dən çox şirkəti birləşdirən dinamik və inkişaf edən regional təşkilatdır. Biznes-hökümət dialoqunun fəal iştirakçısı olan “Caspian Energy Club”un əsas məqsədi Azərbaycanda və “Caspian Energy Club”un fəaliyyət göstərdiyi digər ölkələrdə investisiya və işgüzar mühitin yaxşılaşdırılmasından, həmçinin B2G, B2B və B2C formatlarında dialoqların stimullaşdırılmasından və onlarda fəal iştirak etməkdən ibarətdir.
Biznes-networking üçün beynəlxalq platforma olan “Caspian Energy Club” mütəmadi olaraq müxtəlif tədbirlər təşkil edir.
Mənzil-qərargahı Bakıda yerləşən “Caspian Energy Club”un əsas fəaliyyəti Mərkəzi Dəhliz ölkələrini əhatə edir. Klubun həmçinin Almaniya, BƏƏ, Böyük Britaniya, Çexiya, Estoniya, Finlandiya, Gürcüstan, Qazaxıstan, Qırğızıstan, Latviya, Özbəkistan, Polşa, Türkiyədə rəsmi nümayəndəlikləri, habelə dünyanın müxtəlif ölkələrində səlahiyyətli nümayəndələri var.
“Caspian Energy Club International” 2023-cü ildə “Caspian Energy Club”un beynəlxalq layihələrini idarə etmək məqsədi ilə yaradılıb. 5 il ərzində “Caspian Energy Club International” dünyanın 100 ölkəsində klubun fiziki ofislərini açmağı planlaşdırır. “Caspian Energy Club International”ın əsas öhdəliklərindən biri nümayəndələrin təyin olunmadığı ölkələrdə klubun fəaliyyətini idarə etmək, eləcə də, bütün xarici nümayəndəliklər üçün ümumi strategiyanın formalaşdırılmasıdır.
Bölmənin digər xəbərləri
