ABŞ-AZƏRBAYCAN ƏLAQƏLƏRİNİN PERSPEKTİVLƏRİ MÜZAKİRƏ EDİLMİŞDİR

17.04.2006 [17:28]
Çap et
A⁺ A^-

Müdafiə Nazirliyinin mətbuat xidmətindən AZƏRTAC-a verilən məlumata görə, nazir, general-polkovnik Səfər Əbiyev aprelin 17-də Amerika Birləşmiş Ştatlarının ölkəmizdə diplomatik missiyası başa çatmış səfiri Rino Harniş ilə görüşmüşdür.

Nazir diplomatın Azərbaycanda səfirliyi dövrdə ölkələrimiz arasında ikitərəfli münasibətlərin, o cümlədən hərbi əməkdaşlığın xeyli inkişaf etdiyini diqqətə çarpdırmışdır.

Səfər Əbiyev Ermənistan-Azərbaycan, Dağlıq Qarabağ münaqişəsinin həllinə toxunaraq vurğulamışdır ki, ABŞ münaqişənin beynəlxalq hüquq normaları və dövlətlərin ərazi bütövlüyü çərçivəsində həllini tapması istiqamətində səylərini artırmalıdır. O demişdir: “Hesab edirəm ki, amerikalı həmsədr S.Mənnin regiona səfəri münaqişənin həllinə öz müsbət təsirini göstərəcəkdir”.

Rino Harniş bildirmişdir ki, ABŞ-Azərbaycan əməkdaşlığı strateji xarakter daşıyır. Azərbaycan Prezidenti İlham Əliyevin ABŞ-a rəsmi səfəri əlaqələrimizin daha da inkişaf etməsinə təkan verəcəkdir.

Görüşdə qarşılıqlı maraq doğuran bir sıra məsələlər müzakirə olunmuşdur.