ABŞ BİZNESMENİ PENTAQON ƏMƏKDAŞLARINA VƏ YENİ İRAQ HÖKUMƏTİNİN MƏMURLARINA RÜŞVƏT VERDİYİNİ ETİRAF ETMİŞDİR
Blumun etirafına görə, o, 2003-2005-ci illərdə hökumətin bir sıra əməkdaşları, o cümlədən İraqın bərpası ilə bağlı müqavilələrin paylanmasında iştirak edən iki ABŞ podpolkovniki ilə əlbir olmuşdur. Blum onları ələ almaq üçün nağd pul və qiymətli hədiyyələr şəklində iki milyon dollardan çox xərcləmiş və 8,6 milyon dollar məbləğində müqavilələr bağlamışdır. Ona məxsus firmalar Əl-Hilla şəhərində yeni polis akademiyası üçün bina tikməli və Kərbəladakı ictimai kitabxananı təmir etməli idilər.
Blum ötən ilin noyabrında həbs edilmişdir və hazırda Vaşinqton həbsxanalarından birində məhkəməsini gözləyir. ABŞ hakimiyyət orqanları onun cinayət yoldaşlarını həbs etmişlər.
Blumun vəkilinin sözlərinə görə, biznesmen istintaqla əməkdaşlıq etmiş və xəzinəyə 7,2 milyon dolları qaytarmağa razılıq vermişdir. Bununla belə, onu 40 ilədək azadlıqdan məhrumetmə cəzası və 750 min dollar məbləğində cərimə gözləyir.
ABŞ-ın İraqın bərpası üzrə baş inspektoru Styuart Bouen bildirmişdir ki, hazırda daha 70 belə cinayət işi təhqiq olunur. O, özünün bu yaxınlardakı məruzəsində vurğulamışdır ki, Vaşinqton İraqın bərpası üçün ayırdığı vəsaitin xeyli hissəsi ABŞ və İraq məmurları tərəfindən mənimsənilmişdir.
Bölmənin digər xəbərləri
