ABŞ-ın Yaxın Şərqə əlavə 1000 hərbçi göndərməsi Yaponiyada narahatlıqla qarşılanıb
Tokio, 18 iyun, AZƏRTAC
ABŞ-ın Yaxın Şərqə əlavə 1000 hərbçi göndərməsi barədə qərarı Yaponiyada narahatlıqla qarşılanıb.
AZƏRTAC xəbər verir ki, bu barədə Yaponiya Nazirlər Kabineti Baş katibinin müavini Yasutoşi Nişimura iyunun 18-də keçirilən mətbuat konfransı zamanı bildirib.
“Yaxın Şərq regionunda gərginliyin artması dərin narahatlıq doğurur”, - deyə Y.Nişimura bildirib.
Bu ərəfədə Pentaqon rəhbərinin vəzifələrini icra edən Patrik Şanahan Yaxın Şərqə əlavə 1000 hərbçinin göndəriləcəyini bəyan edib. Bəyanatda qeyd edilir ki, bu, İranla vəziyyətin kəskinləşməsinə görə deyil və ABŞ ilə onun müttəfiqlərinin marağına xidmət edir.
Xatırladaq ki, ötən həftə Oman boğazında iki neft tankerinə hücum edilib. Daxil olan məlumatlara görə, torpedolarla hücum nəticəsində həmin tankerlərdə yanğın baş verib. Lakin hadisənin bu səbədən baş verməsi barədə rəsmi açıqlama yoxdur. Zərər çəkən tankerlərin bütün heyəti təxliyə edilərək İran ərazisinə aparılıb.
ABŞ bu hadisədə İran tərəfini günahlandırsa da, İran bunun əsassız olduğunu bildirib.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
