ABŞ SƏFİRLİYİ “SÜLH KORPUSU”NUN FƏALİYYƏTİNİ DƏSTƏKLƏYİR

09.09.2003 [21:29]
Çap et
A⁺ A^-

Birləşmiş Ştatların Azərbaycandakı müvəqqəti işlər vəkili Nənsi MaKeldauni bildirmişdir ki, onun ölkəsinin Bakıdakı səfirliyi Amerikanın “Sülh korpusu”nun respublikamızda fəaliyyətə başlaması üçün verilmiş təklifi bəyənmişdir və təhsil sahəsində mübadiləyə dair bütün proqramları bundan sonra da dəstəkləyəcəkdir.

Onun sözlərinə görə, “Sülh korpusu”nun 30 könüllüsünün yaxın aylarda Azərbaycana gəlməsi nəzərdə tutulur və 2004-cü ilin sonunadək onların sayı artıb 100 nəfərə çatacaqdır.

Xanım MakEldauni vurğulamışdır ki, “Sülh korpusu” təşkilatının fəaliyyəti hərbi sahə ilə bağlı deyildir, o, ABŞ-dan olan könüllülərin köməyi ilə xarici vətəndaşlara ingilis dilini öyrədir. O demişdir: “Onlar azərbaycanlıların ailələrində yaşayacaq, xalqın adət və ənənələrini öyrənəcək, şagirdlərə ingilis dilini öyrədəcəklər”.

Amerikalı könüllülərin fəaliyyət göstərəcəyi rayonların siyahısı artıq müəyyən edilmişdir.