ABŞ taliblərin Kabilə yaxınlaşması fonunda səfirliyini təxliyə edir
Bakı, 14 avqust, AZƏRTAC
Amerika qoşunlarının mərkəzi komandanlığı ABŞ-ın Əfqanıstandakı səfirliyinin təxliyəsinin qaçılmaz olduğunu hesab edir.
AZƏRTAC “Politico” nəşrinə istinadla xəbər verir ki, Pentaqon Amerikanın diplomatik missiyasını Kabildən tam çıxarmaq niyyətindədir.
Bir qədər əvvəl Birləşmiş Ştatlar Əfqanıstandakı diplomatlarını və mütəxəssisləri təxliyə etmək məqsədilə bu ölkəyə 3 min nəfərlik qoşun göndərəcəyini elan edib.
ABŞ Müdafiə Nazirliyinin rəsmi nümayəndəsi Con Kirbinin sözlərinə görə, Amerika hərbçilərinin əsas hissəsi həftənin sonunadək Əfqanıstanda yerləşdiriləcək. Bu kontingent Kabil aeroportunda ABŞ diplomatlarının və mülki mütəxəssislərin ölkədən təhlükəsiz çıxarılmasını təmin edəcək.
Pentaqonun nümayəndəsi, həmçinin qeyd edib ki, hazırda “Taliban” qüvvələri Əfqanıstan paytaxtını bilavasitə təhdid etmir, lakin onu ölkənin əsas hissəsindən təcrid etməyə çalışır. Vaşinqtonda taliblərin sürətlə irəliləməsini “böyük həyəcanla” izləyirlər.
Qeyd edək ki, 2020-ci ildə “Taliban” hərəkatı və ABŞ arasında imzalanan sülh sazişi çərçivəsində xarici ölkə qoşunlarının Əfqanıstanı tərk etməsi fonunda Əfqanıstanda vəziyyət gərginləşib. “Taliban” silahlıları bütün cəbhəboyu irimiqyaslı hücum əməliyyatlarına başlayıb. Bu ərəfədə taliblər Əfqanıstanın ən iri ikinci şəhəri olan Qəndəhara nəzarəti ələ keçirib.
Bölmənin digər xəbərləri
