Acarıstandan olan və bronxial astmadan əziyyət çəkən 28 uşaq Naxçıvanda müalicə olunub
Tbilisi, 21 iyul, AZƏRTAC
Gürcüstanın Acarıstan Muxtar Respublikasından olan 8-16 yaş arası 28 uşaq Naxçıvan Muxtar Respublikasındakı Duzdağ Fizioterapiya Mərkəzində müalicə olunub.
Bu barədə AZƏRTAC-a Azərbaycanın Batumidəki baş konsulluğundan məlumat verilib.
Baş konsulluğun koordinasiyası əsasında iyulun 5-də Naxçıvana yola salınmış bronxial astma xəstəliklərindən əziyyət çəkən 28 nəfər uşaq iki həftə ərzində Duzdağ Fizioterapiya Mərkəzində müalicə kursundan sonra iyulun 21-də Acarıstana qayıdıblar.
Onları Türkiyə-Gürcüstan Sarpi sərhəd-keçid məntəqəsində baş konsulluğun əməkdaşları qarşılayıblar.
Diplomatlar müalicə kurslarının necə keçmələri, göstərilən tibbi xidmət barədə maraqlanıblar.
Uşaqları müşayiət edən həkim və valideynlər göstərilən yüksək diqqətə və qayğıya görə dərin təşəkkürlərini bildiriblər. Müalicə dövründə Naxçıvan Şəhər İcra Hakimiyyəti tərəfindən xüsusi nümayəndələrin hər gün onlara baş çəkdiklərini, Naxçıvanın tarixi yerlərinə hər gün ekskursiya təşkil etdiklərini və müalicələri ilə yaxından maraqlandıqlarını qeyd ediblər.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
