ADAU-da “Prime Cotton Əməkdaşlıq və Karyera Mərkəzi” açılıb VİDEO
Gəncə, 4 iyun, Elcan Məmmədov, AZƏRTAC
Azərbaycan Dövlət Aqrar Universitetində (ADAU) ölkəmizin pambıq sənayesinin lideri olan “Prime Cotton” şirkətinin dəstəyi ilə yaradılmış ölkənin ilk regional Karyera Mərkəzi olan “Prime Cotton Əməkdaşlıq və Karyera Mərkəzi”nin açılış mərasimi keçirilib.
AZƏRTAC-ın bölgə müxbiri xəbər verir ki, “Prime Cotton”un 30 illik yubileyində Azərbaycanın pambıqçılıq sənayesinin inkişafına xidmət edən bu layihə ADAU ilə “Prime Cotton” arasında 2024-cü ilin sentyabrında imzalanmış Anlaşma Memorandumuna əsasən fəaliyyətə başlayıb.
Açılış mərasimində kənd təsərrüfatı naziri Məcnun Məmmədov, Milli Məclisin Aqrar siyasət komitəsinin sədri Tahir Rzayev, Gəncə Şəhər İcra Hakimiyyətinin başçısı Niyazi Bayramov, ADAU-nun rektoru Zəfər Qurbanov, Türkiyənin Gəncə şəhərindəki Baş Konsulu Recep Öztop və “Prime Cotton”un Baş icraçı direktorunun rəhbərliyi ilə əməkdaşları iştirak ediblər.
“Prime Cotton Əməkdaşlıq və Karyera Mərkəzinin əsas məqsədi tələbələrin bilik və bacarıqlarının artırılması, onları real iş mühiti ilə tanış etmək, eləcə də “Prime Cotton”un kadr ehtiyaclarının qısa, orta və uzunmüddətli perspektivdə təmin olunmasıdır,” – deyə MMC-nin Baş icraçı direktoru Rövşən Mahmudov bildirib.
Onun sözlərinə görə, bu mərkəz sadəcə sosial təşəbbüs deyil, eyni zamanda, şirkət və universitet arasında dayanıqlı və strateji əməkdaşlığın təməlidir. O, mərkəzin gənc aqronom və mühəndislərin yetişdirilməsi üçün strateji əhəmiyyət daşıdığını və ADAU ilə əməkdaşlığın yeni mərhələsini simvolizə etdiyini vurğulayıb.
Memorandum çərçivəsində mərkəz vasitəsilə pambıqçılıq sahəsinə maraq göstərən tələbələr üçün bir sıra fəaliyyətlər həyata keçiriləcək. Tələbələr “Gənc aqronom” və “Gənc mexanik” təcrübə proqramları barədə məlumat alacaq, I - IV kurs tələbələri arasından seçilən istedadlı gənclərlə “Prime Groups” komandaları yaradılacaq. Onlar üçün təlimlər, seminarlar, filial səfərləri və innovativ layihələrdə, o cümlədən “Agro Hackathon”da iştirak imkanları təmin olunacaq. Eyni zamanda, pambıqçılıqda 30 illik təcrübəyə malik “Prime Cotton”un peşəkar mütəxəssisləri tərəfindən təlimlər keçiriləcək, tələbələr istehsalat təcrübəsinə cəlb ediləcək, elmi-tədqiqat layihələri və konfranslar təşkil olunacaq.
Bu təşəbbüs ADAU və “Prime Cotton” arasında dövlət-özəl tərəfdaşlığının uğurlu nümunəsi olmaqla, kənd təsərrüfatı sektorunda innovativ və dayanıqlı inkişafın təminatına mühüm töhfə verəcək. Hər iki tərəf əməkdaşlığın genişləndirilməsi və yeni layihələrin həyata keçirilməsi istiqamətində fəaliyyətlərini davam etdirməyi planlaşdırır.
Bölmənin digər xəbərləri
