AĞ EV MƏKTƏBLƏRDƏ RİYAZİYYATIN TƏDRİSİ İLƏ MƏŞĞUL OLACAQ

15.11.2006 [17:25]
Çap et
A⁺ A^-

AZƏRTAC “Nyu-York tayms” qəzetinin saytına istinadla xəbər verir ki, ABŞ məktəblərdə riyaziyyat fənninin tədrisi proqramına yenidən baxmaq fikrindədir. Çünki amerikalı məktəblilərin riyazi biliyinin səviyyəsi son vaxtlar xeyli aşağı düşmüşdür ki, bu da təkcə valideynlərdə deyil, hökumətdə də narahatlıq doğurur.

Odur ki, Corc Buş hökuməti ölkədə riyaziyyatın tədrisində vəziyyətin öyrənilməsi üçün xüsusi komissiya yaratmışdır. Gözlənildiyinə görə, komissiya öz işinin nəticələri barədə artıq 2007-ci ilin əvvəllərində məlumat verəcəkdir.

Lakin riyaziyyat müəllimlərinin Milli Birliyi tərəfindən təqdim edilmiş məruzədə deyilir ki, riyazi savad səviyyəsinin aşağı düşməsi uşaqlara bu fənnin 1991-ci ildə qəbul olunmuş proqram əsasında öyrədilməsi ilə bağlıdır. Proqrama görə, şagirdlər riyazi məsələlərin həllinə yanaşmaları müstəqil axtarmalı, öz təxəyyülünə güc verməli, hazır düsturları əzbərləməməlidirlər.

Nəticədə amerikalı şagirdlərdə riyaziyyat üzrə adi baza biliyi yoxdur, valideynlər isə öz uşaqlarının heç olmasa vurma-bölmə qaydalarına yiyələnməsi üçün özəl repetitorların köməyindən istifadə etmək məcburiyyətində qalırlar.

Bəzi mütəxəssislərin fikrincə, ABŞ-da riyaziyyatın tədrisində vəziyyət “sadəcə olaraq fəlakətlidir”.