Ağdam ayaqqabı fabriki regionun sosial-iqtisadi inkişafına töhfə verir VİDEO
Ağdam, 1 avqust, AZƏRTAC
İşğaldan azad olunmuş ərazilərdə genişmiqyaslı bərpa və quruculuq tədbirlərinin həyata keçirilməsi ilə yanaşı, iqtisadi fəallığın təmin olunması, yeni istehsal sahələrinin yaradılması və əhalinin məşğulluğunun artırılması istiqamətində də mühüm layihələr icra olunur. Ağdam Sənaye Parkı bu baxımdan regionun sənaye potensialının formalaşdığı əsas ünvanlardan biridir.
AZƏRTAC-ın bölgə müxbiri xəbər verir ki, rezidentlərin sayına görə ölkənin sənaye zonaları arasında ikinci yerdə olan Ağdam Sənaye Parkında 30 sahibkarlıq subyektinə rezidentlik, 4 sahibkara isə qeyri-rezidentlik statusu verilib. Parkda fəaliyyət göstərən müəssisələrə investorlar tərəfindən 177 milyon manatdan çox investisiya yatırılıb, 1230 daimi iş yeri yaradılıb. Hazırda burada 12 müəssisə fəaliyyət göstərir, 12 müəssisənin tikintisi davam edir, 10 müəssisə üzrə isə layihələndirmə işləri aparılır.
Parkda fəaliyyət göstərən müəssisələrdən biri – “BAFCO İnvest” MMC-nin ayaqqabı fabriki müasir istehsal imkanları ilə seçilir. Müəssisənin istehsal üzrə direktor müavini Musa Alızadə bildirib ki, fabrikdə hazırda 20-yə yaxın ayaqqabı modeli istehsal olunur. Bununla yanaşı, müxtəlif rəng və təyinatlı poliuretan çəkmələrin istehsalı da həyata keçirilir.
Onun sözlərinə görə, müəssisənin məhsulları həm daxili, həm də xarici bazarlarda təqdim olunur. Artıq bir sıra ölkələrə ixrac həyata keçirilib. Əsas ixrac istiqamətləri sırasında Birləşmiş Ərəb Əmirlikləri, Rusiya və Qazaxıstan yer alır. Yaxın vaxtlarda Qazaxıstana 8 min cüt ayaqqabı göndərilib.
Musa Alızadə qeyd edib ki, müəssisə beynəlxalq sərgilərdə də iştirak edərək məhsullarını xarici tərəfdaşlara təqdim edir. Yaxın və Orta Şərq, eləcə də Avropa ölkələrinə ixrac imkanlarının genişləndirilməsi istiqamətində işlər aparılır. Müəssisənin EN İSO uyğunluq sertifikatına malik olması fabrikin məhsullarının Avropa və dünyanın digər bazarlarına ixracına imkan yaradır.
Ağdam Sənaye Parkında yaradılan istehsal sahələri, eyni zamanda, doğma torpaqlarına qayıdan sakinlərin məşğulluğuna da mühüm töhfə verir. Fabrikdə hazırda 70 nəfərdən çox əməkdaş çalışır ki, onların da əksəriyyəti Ağdam və ətraf rayonların sakinləridir.
Müəssisədə çalışan keçmiş məcburi köçkün Aygül Allahverdiyeva bir il əvvəl Ağdam rayonunun Kəngərli kəndinə köçdüyünü və həmin vaxtdan müəssisədə işlə təmin olunduğunu deyib: “Evimiz də gözəldir, işimizdən də razıyıq. Çox sevinirik, qürur duyuruq ki, işğaldan azad olunmuş torpaqlarımızda yaşayırıq, işləyirik”, – deyə A.Allahverdiyeva bildirib.
Müəssisənin digər əməkdaşı Əsgər Əliyev isə iki ildən artıqdır burada işləyir. O, fabrikdə növbə rəisi kimi çalışdığını, istehsal avadanlıqlarına nəzarət etdiyini və yaranan texniki problemlərin aradan qaldırılmasına cavabdeh olduğunu qeyd edib.
“Bizə bu sevinci yaşadan şəhidlərimizə Allah rəhmət eləsin, qazilərimizə cansağlığı versin. Gəlmişik doğma torpaqlarımıza”, – deyə Ə.Əliyev vurğulayıb.
Qeyd edək ki, “BAFCO İnvest” MMC-nin ayaqqabı fabrikində xüsusi təyinatlı ayaqqabıların illik istehsal gücü 360 min cüt, poliuretan çəkmələrin istehsal gücü isə 150 min cüt təşkil edir. Ağdam Sənaye Parkında yaradılan belə müəssisələr göstərir ki, işğaldan azad olunmuş ərazilərdə bərpa prosesi yalnız quruculuqla deyil, həm də istehsalın və iqtisadi həyatın yenidən canlanması ilə müşayiət olunur.
Müxbir – Tahir Ağaməmmədov
Bölmənin digər xəbərləri
