AĞDAM RAYONU 32 NÖMRƏLİ KÖÇKÜN ORTA MƏKTƏBİNİN MÜƏLLİMİ LEYLA QULİYEVANIN ÇIXIŞI
Ağdam rayonu 32 nömrəli köçkün orta məktəbinin müəllimi LEYLA QULİYEVA qurultay iştirakçılarını salamlayaraq, ərazisinin böyük bir hissəsi erməni işğalına məruz qalmış rayonun təhsil işçiləri adından çıxış etdiyini bildirdi. O, ürək ağrısı ilə dedi ki, ziyalı potensialı, güclü iqtisadiyyatı və sosial bazası ilə fərqlənən Ağdam rayonu da siyasi oyunlar və xəyanət nəticəsində erməni təcavüzünün qurbanı olmuşdur. Bu zərbə təhsilə də dəymişdir. Lakin dövlətimizin təhsilə olan diqqəti və qayğısı sayəsində respublikanın ayrı-ayrı rayon və şəhərlərində Ağdamın 118 köçkün məktəbi fəaliyyət göstərir. Məcburi köçkün məktəblərinin problemlərindən danışan natiq vurğuladı ki, bunların həllində təkcə dövlətin deyil, bütün cəmiyyətin iştirak etməsi vacibdir.
O daha sonra dedi ki, Azərbaycan müəllimlərinin bu mötəbər məclisi çox əlamətdar bir vaxta təsadüf edir və mən bir neçə gündən sonra xalqımızın düzgün seçim edəcəyinə ümidvaram.
Bölmənin digər xəbərləri
