Ağdam rayonunun 24 minə yaxın sakini tibbi müayinədən keçmişdir
Ağdam, 18 mart (AZƏRTAC, Tahir Ağaməmmədov). Azərbaycan Prezidenti İlham Əliyevin tapşırığı əsasında ölkə əhalisinin pulsuz tibbi müayinədən keçirilməsi kampaniyası Ağdam rayonunda da uğurla davam etdirilir.
Ağdam Rayon İcra Hakimiyyəti başçısının müavini Ağa Zeynalov AZƏRTAC-a bildirmişdir ki, rayon sakinləri qrafik əsasında mərkəzi rayon xəstəxanasında və kəndlərdəki sahə xəstəxanalarında müayinə olunurlar. Eyni zamanda, yüksək ixtisaslı mütəxəssislərdən ibarət səyyar həkim briqadaları tərəfindən rayonun kənd və qəsəbələrində əhalinin müayinəsi həyata keçirilir. Fevralın 17-dən indiyədək 20-dən çox idarə, müəssisə və təşkilatların kollektivləri, 25 yaşayış məntəqəsinin sakinləri, ümumilikdə 24 min nəfərə yaxın vətəndaş tibbi müayinədən keçirilmişdir. Müayinə olunmuş sakinlərdən 4068 nəfəri ambulator, 35 nəfəri stasionar müalicəyə cəlb edilmiş, 22 nəfər respublikanın ixtisaslaşmış xəstəxanalarına göndərilmişdir.
Mərkəzi Rayon Xəstəxanasının baş həkiminin müavini Qara Qasımov bildirmişdir ki, bu xeyirxah aksiyanın mütəşəkkil keçirilməsi üçün xəstəxanada hər cür şərait yaradılmışdır. Müayinəyə bütün ixtisaslardan olan həkimlər cəlb olunmuşdur. Vətəndaşlar kardioqram, ultrasəs, rentgen, laborator və digər müayinələrdən keçirilir. Aşkara çıxarılan xəstəliklər üzrə müalicə kursları təyin edilir.
Prezident İlham Əliyevin bu humanist təşəbbüsü rayon sakinləri tərəfindən böyük razılıqla qarşılanır. Mərkəzi Rayon Xəstəxanasında tibbi müayinədən keçən rayon icra hakimiyyəti başçısının Quzanlı qəsəbə inzibati ərazi dairəsi üzrə nümayəndəsi Xəyalı Əliyeva AZƏRTAC-a müsahibəsində demişdir: Bütün ölkə vətəndaşlarının tibbi müayinəyə cəlb edilməsi dövlətimizin başçısının əhalinin sağlamlığına göstərdiyi diqqət və qayğının daha bir bariz nümunəsidir. Aksiya xəstəliklərin müəyyən edilərək vaxtında müalicə edilməsi baxımından çox böyük əhəmiyyət daşıyır. Fürsətdən istifadə edərək, Quzanlı sakinlərinin Prezidentimizə dərin minnətdarlığını çatdırmaq istərdim.
Bölmənin digər xəbərləri
