Ağdamda cəsur əsgər Rahib Məmmədovun xatirəsi anılıb
Ağdam, 5 fevral, Tahir Ağaməmmədov, AZƏRTAC
Cəsur azərbaycanlı əsgər Rahib Məmmədovun xatirəsi onun adını daşıyan Ağdam rayonu Mahrızlı kəndindəki Döyüş Şöhrəti Muzeyində anılıb. Mərasimdə Rahib Məmmədovun ailə üzvləri, sinif və tələbə yoldaşları, mədəniyyət və təhsil işçiləri, məktəblilər iştirak edib.
AZƏRTAC-ın bölgə müxbiri xəbər verir ki, tədbir iştirakçıları əvvəlcə R.Məmmədovun Mahrızlı kənd tam orta məktəbinin qarşısındakı büstü önünə əklil qoyublar. Rahib Məmmədovun və Azərbaycanın ərazi bütövlüyü uğrunda şəhid olan Vətən övladlarının xatirəsi ehtiramla yad edilib.
Muzeyin direktoru Sahib Məmmədov, Mahrızlı kənd tam orta məktəbinin müəllimi Vaqif Əsədov, Rahib Məmmədovun tələbə yoldaşı Mirağa Ağamirov, sinif yoldaşı Məhəmməd Məmmədov, Zəngişalı kənd mədəniyyət evinin müdiri Fikrət Əliyev çıxış edərək, onun mənalı və qəhrəmanlıqla dolu həyatından danışıblar. Məlumat verilib ki, Rahib Gülmalı oğlu Məmmədov 1967-ci ildə Ağdam rayonunun Mahrızlı kəndində anadan olub. 1987-ci ildə hərbi xidmət keçdiyi Gürcüstanın Xobi rayonunun Çaladidi kəndində böyük fədakarlıq göstərərək, təbii fəlakət zamanı 28 sakini seldən xilas edib və qəhrəmanlıqla həlak olub. Ölümündən sonra “Qırmızı Ulduz” ordeni ilə təltif edilib. Təhsil aldığı Mahrızlı kənd tam orta məktəbi onun adını daşıyır. Məktəbin həyətində Rahib Məmmədov adına Döyüş şöhrəti muzeyi yaradılıb. Bakının Xətai rayonunun Əhmədli yaşayış massivində Rahib Məmmədov adına küçə var. Gürcüstanın Çaladidi kəndində cəsur əsgərin abidəsi qoyulub.
Mərasimdə məktəblilərin ifasında şeirlər səsləndirilib. Tədbirdə fəal şagirdlərə fəxri fərman təqdim edilib.
Tədbir iştirakçıları sonra Döyüş Şöhrəti Muzeyində R.Məmmədova, həmçinin Qarabağ müharibəsində şəhid olmuş Vətən övladlarına məxsus əşyalarla tanış olublar.
Bölmənin digər xəbərləri
