AĞDAMDA FAŞİZM ÜZƏRİNDƏ QƏLƏBƏNİN 63-CÜ İLDÖNÜMÜ BAYRAM EDİLMİŞDİR
AZƏRTAC xəbər verir ki, Ağdam rayonunda faşizm üzərində qələbənin 63-cü ildönümü münasibətilə ümumrayon toplantısı keçirilmişdir. Yığıncaqda Böyük Vətən müharibəsi veteranları, ziyalılar, rayon ictimaiyyətinin nümayəndələri iştirak etmişlər.
Rayon icra hakimiyyətinin başçısı Həsən Sarıyev müharibə veteranlarını Qələbə günü münasibətilə təbrik etmiş, faşizm üzərində qələbənin qazanılmasında azərbaycanlıların rolundan danışmışdır.
Çıxış edən müharibə veteranları keçdikləri şərəfli döyüş yollarından danışmış və inamla bildirmişlər ki, Prezident İlham Əliyevin yeritdiyi daxili və xarici siyasət nəticəsində respublikamızın ərazi bütövlüyü təmin olunacaq, Qələbə münasibətilə şənliklər işğaldan azad edilmiş torpaqlarımızda qeyd olunacaqdır.
Böyük Vətən müharibəsi iştirakçılarına hədiyyələr verilmişdir.
Yığıncaqda Prezident, Ali baş komandan İlham Əliyevə tədbir iştirakçıları adından təbrik məktubu oxunmuşdur.
Tədbir rayon mədəniyyət və turizm şöbəsinin hazırladığı konsert proqramı ilə davam etdirilmişdir.
