AĞDAMDA KƏND TƏSƏRRÜFATI MƏHSULLARI İSTEHSALÇILARININ YIĞINCAĞI OLMUŞDUR
AZƏRTAC xəbər verir ki, Ağdam rayonunda Azərbaycan Prezidentinin “Kənd təsərrüfatı məhsulları istehsalçılarının toxum, gübrə və damazlıq heyvanları ilə təmin edilməsinə əlavə dəstək verilməsi barədə” 2008-ci il 21 avqust tarixli Sərəncamından irəli gələn məsələlərə həsr olunmuş yığıncaq keçirilmişdir.
Rayon Sahibkarlar Assosasiyasının sədri Nazim Quliyev bildirmişdir ki, aqrar sahədə çalışanlara müddətli vergi güzəştlərinin tətbiqi, yanacaq, motor yağlarına görə dövlət büdcəsindən yardımların, toxumçuluq təsərrüfatlarına yetişdirilən bitki toxumlarına görə subsidiyaların verilməsi, mineral gübrənin 50 faiz güzəştlə satılması və suvarma suyuna olan tələbatın təmin edilməsi üçün subartezian quyularının qazılması kənd təsərrüfatı məhsullarının istehsalının artmasına səbəb olmuşdur. Cari ildə rayonun əkin sahələrindən ötən ilə nisbətən 2 min 500 tondan çox taxıl yığılmışdır. Qaramalın sayı 30,3 min başa, davarların sayı 108 min başa çatmışdır. Kartof, bostan-tərəvəz, meyvə istehsalı da artmışdır.
Yığıncaqda xüsusi vurğulanmışdır ki, Prezidentin son Sərəncamı kənd təsərrüfatı məhsulları istehsalçılarına böyük dəstək olacaq və aqrar sahənin daha da inkişafına təkan verəcəkdir.
Bölmənin digər xəbərləri
