AĞSU RAYONUNDA HƏYATA KEÇİRİLƏN PROFİLAKTİKİ TƏDBİRLƏR EPİZOOTİK SABİTLİYİ TƏMİN EDİR
Heyvandarlıq Ağsu rayonunda aparıcı sahələrdəndir. 2008-ci ilin doqquz ayının statistik məlumatlarına görə, rayonda 39.252 baş iribuynuzlu mal-qara, 147 min 246 baş qoyun-keçi, 217 min 064 baş quş vardır.
Ötən ilin müvafiq dövrü ilə müqayisədə iribuynuzlu mal-qaranın sayı 160 baş, davarların sayı 1133 baş, quşların sayı isə 13.299 baş artmışdır.
Heyvandarlığın inkişafı həm də epizootik sabitliyin qorunmasından asılıdır. Bununla əlaqədər rayonda ciddi və ardıcıl profilaktiki tədbirlər həyata keçirilir.
Rayon baytarlıq idarəsindən AZƏRTAC-a bildirmişlər ki, 2008-ci ilin ilk epizootik tədbirlər planı vaxtından əvvəl, müvəffəqiyyətlə başa çatdırılmışdır. Ötən müddətdə heyvanlarda brüsellyoza qarşı diaqnostik müayinə, qarayara, dabaq və quduzluq əleyhinə profilaktiki peyvənd işləri yerinə yetirilmişdir. Yuxarıda göstərilən tədbirlərə dair diaqnostikum və vaksinlər bütünlüklə dövlət tərəfindən maliyyələşdirilmişdir. Bununla yanaşı, mülkiyyətçilərin şəxsi vəsaiti ilə bradzod, pasterellyoz, emkar (yanıqara) xəstəliklərinin də profilaktikası aparılmışdır. Bütün bunların nəticəsidir ki, son illər rayonda heyvanlar arasında təhlükəli xəstəliklər qeydə alınmamışdır.
Bölmənin digər xəbərləri
