AĞSU RAYONUNUN 108 YAŞLI SAKİNİNƏ MİNİK AVTOMOBİLİ HƏDİYYƏ EDİLMİŞDİR
AZƏRTAC xəbər verir ki, oktyabrın 29-da əmək və əhalinin sosial müdafiəsi naziri Füzuli Ələkbərov Ağsu rayon Sosial Müdafiə Mərkəzində Kəndoba kəndinin 108 yaşlı sakini Bəxtiyar Nadirova “Oka” avtomobilinin açarlarını təqdim etmişdir.
Ahıllar günü münasibətilə veteranı təbrik edən nazir ölkəmizdə həyata keçirilən sosial-iqtisadi inkişafdan danışaraq, artıq Azərbaycanın böyük maliyyə ehtiyatlarına malik olduğunu vurğulamış, bütün kateqoriyalardan olan insanlara, o cümlədən ahıllara göstərilən qayğıdan bəhs etmişdir. Bayram münasibətilə yaşı 100-dən çox olan hər bir Azərbaycan vətəndaşına “Oka” minik avtomobili, habelə rəngli televizor və soyuducu hədiyyə ediləcəyini bildirən nazir, son illər Böyük Vətən və Qarabağ müharibələri əlillərinə, veteranlara göstərilən maddi və mənəvi yardımlar haqqında danışmışdır. Qeyd olunmuşdur ki, indiyədək 2000 nəfər əlil və veterana minik avtomobili verilmişdir. Təkcə bu ilin əvvəlindən bəri “Oka” markalı avtomobil alanların sayı 405 nəfər təşkil edir. İlin sonunadək daha 200 nəfərə maşın veriləcəkdir.
Bəxtiyar Nadirov ömrünün ahıl çağında göstərilən diqqət və qayğıya görə dərin minnətdarlığını bildirmişdir. Nazirlə çay süfrəsi arxasında əyləşən ixtiyar ağır müharibə illərinin acı xatirələrindən danışmış, bu gün azad və xoşbəxt günlərini yaşayan həmvətənlərinə uca tanrıdan firavanlıq və dinclik diləmişdir.
Görüşdə rayon icra hakimiyyətinin başçısı Ənvər Seyidəliyev iştirak etmişdir.
