Aİ-ÜST layihəsi psixi sağlamlıq ehtiyaclarını qarşılamaq üçün potensialı artırmağa davam edir
Bakı, 24 avqust, AZƏRTAC
Avropa İttifaqının (Aİ) maliyyələşdirdiyi və Ümumdünya Səhiyyə Təşkilatının (ÜST) Azərbaycan nümayəndəliyinin həyata keçirdiyi “Psixi sağlamlıq xidmətlərinin münaqişədən sonrakı dövrdə koordinasiyası və transformasiyası” layihəsi çərçivəsində Psixososial Dəstək, Təlim və Tədqiqat Mərkəzi tərəfindən psixi sağlamlıq sahəsində çalışan sosial işçilər və psixoloqlar üçün “Təməl psixososial dəstək bacarıqları” mövzusunda 3 günlük düşərgə təşkil olunub. Düşərgədə müvafiq təlimçilər tərəfindən psixi sağlamlıq və sosial iş üzrə təlimlər keçirilib.
Ümumdünya Səhiyyə Təşkilatının Azərbaycan nümayəndəliyindən AZƏRTAC-a bildirilib ki, “Psixi sağlamlıq xidmətlərinin və klinik təcrübənin əsasları” mövzusunda keçirilən ilk təlim zamanı təlimçilər klinik psixoloqlar Günel Muradova və Nərmin Osmanlı tərəfindən iştirakçılara təməl psixi sağlamlıq və psixososial dəstək konsepsiyaları və təməl psixososial dəstək bacarıqları, özünəqayğı, effektiv kommunikasiya bacarıqlarından istifadə, psixi, nevroloji və maddə asılılığı pozuntularının qiymətləndirilməsinin aparılması, idarə edilməsi və izlənməsi, biopsixososial model haqqında geniş məlumat verilib.
Düşərgədə “Sosial işin əsasları və keyslərin idarəolunmasının əhəmiyyəti” mövzusunda keçirilən ikinci təlim zamanı təlimçi Sara Ağayeva tərəfindən iştirakçılara ilk olaraq sosial işin tarixi inkişafı, fəaliyyət sahələri, istiqamətləri, sosial iş təcrübəsində lazım olan bilik, bacarıq və iş etikası haqqında məlumat verilib. Təlimin ikinci hissəsində sosial xidmət üçün müraciət etmiş insanlara çoxçeşidli xidmətlər göstərilməsinə yönəlmiş bir-biri ilə bağlı ardıcıl tapşırıqlar silsiləsindən ibarət problemlərin sistematik həlli prosesi olan keyslərin idarəolunması mövzusu işlənib. Burada iştirakçılara planlaşdırma, keyslərin monitorinqi və onların idarəsində çoxprofilli komandanın rolu haqqında məlumat verilib.
Təlimlərin interaktivliyi üçün qrup işləri, rol oyunları, videonümayişlər və müzakirə sessiyaları keçirilib. Təlimin sonunda bütün iştirakçılar sertifikatla təltif olunub.
Psixi sağlamlıq xidmətlərinin münaqişədən sonrakı dövrdə koordinasiyası və transformasiyası layihəsi psixi sağlamlıq xidmətlərinin ilkin səhiyyə səviyyəsində təkmilləşdirilməsi məqsədilə ÜST-nin Azərbaycan ölkə ofisi tərəfindən Avropa İttifaqının maliyyə dəstəyi ilə həyata keçirilir. Layihənin məqsədi psixi sağlamlıq və psixo-sosial dəstək üçün multidistiplinar koordinasiya mexanizminin yaradılmasına yardım etmək və ilkin səhiyyə xidməti müəssisələrində psixi sağlamlıq xidmətləri potensialını artırmaqdır. Sözügedən layihə Aİ və ÜST-nin Azərbaycana davamlı dəstəyinin tərkib hissəsidir.
Bölmənin digər xəbərləri
