“AİLƏ-KƏNDLİ TƏSƏRRÜFATI HAQQINDA” QANUN LAYİHƏSİ MİLLİ MƏCLİSİN MÜZAKİRƏSİNƏ ÇIXARILACAQ
AZƏRTAC xəbər verir ki, Milli Məclisin aqrar siyasət daimi komissiyasının oktyabrın 6-da keçirilən iclasında “Ailə-kəndli təsərrüfatı haqqında” qanun layihəsi müzakirə olunmuşdur. Komissiyanın sədri Eldar İbrahimov demişdir ki, bu qanunun əsas vəzifəsi ailə-kəndli təsərrüfatının hüquqi, iqtisadi və təşkilati əsaslarını müəyyən etmək, kənd sakinlərinə verilmiş torpaqlardan tam və səmərəli istifadənin, kənd əhalisinin maddi vəziyyətini yaxşılaşdırmaq və yoxsulluğun azaldılmasına kömək göstərmək üçün əlverişli bazanın yaradılmasıdır. Qanun layihəsi təsərrüfatı genişləndirərək, intensiv texnologiyaları tətbiq imkanı olmayan və hazırda kəndlərdə yaşayan 846 min ailənin hüquqi statusunu müəyyənləşdirmək etmək, onların sosial müdafiəsini təmin etmək məqsədi ilə hazırlanmışdır.
Müzakirələr zamanı Milli Məclis sədrinin birinci müavini Arif Rəhimzadə, deputatlar, dəvət olunmuş mütəxəssislər layihə ilə bağlı irad və təkliflərini bildirmişlər.
Layihənin Milli Məclisin müzakirəsinə çıxarılması qərara alınmışdır.
