Ailədən gələn peşə sevgisi: Britaniyada baş geofizik olan azərbaycanlı mütəxəssislə MÜSAHİBƏ
London, 21 sentyabr, AZƏRTAC
15 ildən artıq geofizika və geotexnika sahəsində təcrübəyə malik azərbaycanlı mütəxəssis Seymur İdrisov hazırda Böyük Britaniyada “Fugro” şirkətində baş geofizik vəzifəsində çalışır. Azərbaycanda müxtəlif neft-qaz və mühəndislik layihələrində fəaliyyət göstərən S.İdrisov sonrakı mərhələdə karyerasını beynəlxalq müstəvidə davam etdirib. Onun sözlərinə görə, geofizika sahəsinə marağının formalaşmasında ailəsinin də böyük rolu olub. Anasının geoloq, atasının isə coğrafiya müəllimi, daha sonra Kosmik Tədqiqatlar İnstitutunda elmi işçi kimi fəaliyyət göstərməsi onda hələ erkən yaşlardan Yer elmlərinə maraq yaradıb.
Seymur İdrisov AZƏRTAC-a müsahibəsində Böyük Britaniyadakı fəaliyyəti, geofiziki və geotexniki tədqiqatların müasir mühəndislik layihələrində rolu, süni intellektin bu sahəyə təsiri, eləcə də beynəlxalq karyera qurmaq istəyən azərbaycanlı gənclər üçün tövsiyələrindən danışıb.
-Uzun illər Azərbaycanda geofizik və geotexniki mühəndis kimi çalışmısınız. Böyük Britaniyada karyeranızı davam etdirmək qərarınız necə yarandı?
-Karyeramı beynəlxalq müstəvidə inkişaf etdirmək, qabaqcıl texnologiyalarla işləmək və daha mürəkkəb layihələrdə iştirak etmək istəyirdim. Böyük Britaniya bu sahədə dünyanın aparıcı mərkəzlərindən biri olduğuna görə burada çalışmağa qərar verdim. Bu addım mənə müxtəlif ölkələrdən olan mütəxəssislərlə işləmək və beynəlxalq təcrübə qazanmaq imkanı yaradıb.
-Hazırda “Fugro” şirkətində baş geofizik vəzifəsində çalışırsınız. İşiniz əsasən nədən ibarətdir?
-Əsas fəaliyyətim dəniz dibi və yeraltı geofiziki məlumatların geoloji və geotexniki məlumatlarla birlikdə interpretasiyası və inteqrasiyasından ibarətdir. Bu məlumatlar əsasında enerji, dəniz infrastrukturu və mühəndislik layihələri üçün inteqrə olunmuş yer modellərinin hazırlanmasına dəstək verirəm. Həmçinin texniki tövsiyələrin hazırlanması, layihələrin idarə olunması, müştərilərlə texniki əməkdaşlıq, hesabatların hazırlanması və gənc mütəxəssislərin peşəkar inkişafına dəstək göstərilməsi də işimin vacib hissəsidir.
-Azərbaycanlı mütəxəssis kimi Böyük Britaniyada belə ixtisaslaşmış bir sahədə çalışmaq sizin üçün nə ifadə edir?
-Bu, mənim üçün həm fərəhverici, həm də məsuliyyətdir. Beynəlxalq mühitdə çalışaraq ölkəmi təmsil etmək və azərbaycanlı mütəxəssislərin peşəkarlığını nümayiş etdirmək mənim üçün xüsusi əhəmiyyət daşıyır. Hesab edirəm ki, müxtəlif ölkələrdə uğur qazanan azərbaycanlı mütəxəssislər ölkəmizin insan kapitalının potensialını göstərirlər.
-Geofiziki və geotexniki məlumatlar nüvə tullantılarının təhlükəsiz idarə olunması ilə bağlı layihələrdə hansı rolu oynayır?
-Bu məlumatlar yeraltı süxurların və geoloji mühitin xüsusiyyətlərini qiymətləndirməyə, potensial riskləri müəyyən etməyə və tullantıların uzunmüddətli təhlükəsiz saxlanılması üçün ən uyğun geoloji şəraiti seçməyə imkan verir. Belə layihələrdə təhlükəsizlik prioritet olduğundan geofiziki və geotexniki tədqiqatlar böyük əhəmiyyət daşıyır.
-Azərbaycanda qazandığınız uzunmüddətli iş təcrübəsi Böyük Britaniyadakı fəaliyyətinizdə sizə necə kömək edib?
-Azərbaycanda müxtəlif geoloji şəraitlərdə və iri beynəlxalq layihələrdə qazandığım təcrübə mənə güclü texniki baza formalaşdırıb. Bu təcrübə mürəkkəb layihələrin idarə olunmasında və texniki qərarların verilməsində bu gün də mənə kömək edir. Xüsusilə Xəzər regionunda işləmək fərqli geoloji şəraitlərlə bağlı dəyərli praktiki biliklər qazandırıb.
-Texnologiyanın, xüsusilə süni intellektin inkişafı geofiziklərin işini necə dəyişir?
-Süni intellekt geofiziki məlumatların emalı və interpretasiyasını əhəmiyyətli dərəcədə sürətləndirir, layihələrin icrasını daha səmərəli edir. Bu texnologiyalar böyükhəcmli məlumatların təhlilinə sərf olunan vaxtı azaldaraq mütəxəssislərin nəticələrin qiymətləndirilməsinə daha çox diqqət ayırmasına imkan yaradır. Bununla belə, son nəticələrin düzgün şərh olunmasında geofiziklərin təcrübəsi əsas amil olaraq qalır.
-Böyük Britaniyada qazandığınız bilik və təcrübəni gələcəkdə Azərbaycanda tətbiq etmək və ya ölkəmizdə həyata keçirilən layihələrə töhfə vermək istərdinizmi?
-Əlbəttə. Azərbaycanın elm və mühəndislik sahələrinin inkişafına töhfə vermək mənim üçün çox önəmlidir. Gələcəkdə təcrübə mübadiləsi, təlimlər və birgə layihələr vasitəsilə bu prosesdə iştirak etmək istərdim. Xüsusilə gənc mütəxəssislərin peşəkar inkişafına dəstək verməkdən məmnun olaram.
-Geofizika və geotexnika sahəsində beynəlxalq karyera qurmaq istəyən azərbaycanlı gənclərə hansı tövsiyələri verərdiniz?
-Gənclərə tövsiyəm odur ki, fundamental biliklərə ciddi diqqət yetirsinlər, ingilis dilini yüksək səviyyədə öyrənsinlər və yeni texnologiyalara açıq olsunlar. Davamlı öyrənmə, peşəkarlıq və əzmkarlıq beynəlxalq karyerada uğurun əsas amilləridir. Eyni zamanda, praktiki təcrübə qazanmağa və beynəlxalq peşəkar əlaqələr qurmağa da xüsusi önəm versinlər.
Bölmənin digər xəbərləri
