ELM VƏ TƏHSİL
ALİ MƏKTƏBLƏRƏ SƏNƏD QƏBULU ELAN OLUNMUŞDUR
Tələbə Qəbulu üzrə Dövlət Komissiyası (TQDK) 2007-2008-ci tədris ili üçün Azərbaycanın ali məktəblərinə mərkəzləşdirilmiş qaydada tələbə qəbulu elan etmişdir.
TQDK-dan AZƏRTAC-a bildirmişlər ki, bu il 27 dövlət, 16 özəl ali məktəblərinə plan üzrə yerlərin ümumi sayı 26 min 704-dür (ötən il - 25629). Onlardan 22 min 884-ü dövlət (ötən il - 22479), 3 min 820-si özəl (ötən il - 3150) ali təhsil müəssisələrinin payına düşür. Dövlət ali məktəbləri üzrə 10 min 807 plan yeri ödənişsiz, 12 min 77 yer isə ödənişli əsaslarladır.
Azərbaycan bölməsi üzrə 19 min 520, rus bölməsi üzrə 3 min 457, birgə müsabiqə üzrə isə 3 min 727 plan yeri ayrılmışdır.
Tədris ilində 259 adda ixtisas üzrə qəbul aparılacaqdır. Onlardan 113 ixtisas I qrupa, 49 ixtisas II qrupa, 75 ixtisas III qrupa, 25 ixtisas isə IV qrupa aiddir.
Ali məktəblərin qəbul planına daxil edilmiş yeni ixtisaslar aşağıdakılardır: torpaq kadastrı, yer quruluşu və torpaq müfəttişliyi, regionşünaslıq - İran, Pakistan, Koreya (Bakı Dövlət Universiteti), fövqəladə hallar və həyat fəaliyyətinin təhlükəsizliyi (Azərbaycan Texniki Universiteti, Memarlıq və İnşaat Universiteti), informasiya işlənməsinin və idarəetmənin avtomatlaşdırılmış sistemləri - hava nəqliyyatında, istehsalat və xidmət sahələrinin iqtisadiyyatı və idarəedilməsi (Milli Aviasiya Akademiyası), təhsilin təşkili və idarə olunması (Azərbaycan Dövlət Pedaqoji Universiteti), tarix və coğrafiya (Azərbaycan Müəllimlər İnstitutu), hərbi həkim işi (Azərbaycan Tibb Universiteti), tibbi profilaktika (Naxçıvan Dövlət Universiteti) və s.
Müsabiqəyə I ixtisas qrupunda ümumi balı 200-dən, digər qruplarda isə 250-dən az olmayan abituriyentlər buraxılırlar. Bu zaman abituriyentin hər bir imtahan fənni üzrə ayrılıqda topladığı nisbi balı 10-dan az olmamalıdır.
Xüsusi qabiliyyət tələb edən təhsili ödənişsiz və ödənişli əsaslarla olan ixtisaslar üzrə müsabiqəyə qabiliyyət imtahanından “məqbul” alan və test imtahanından ən azı 100 bal toplayan abituriyentlər buraxılırlar (fənlər üzrə cavablara nisbi bal məhdudiyyəti qoyulmur). Müsabiqə abituriyentin test imtahanından topladığı ballar əsasında aparılır.
Respublikamız üçün müxtəlif sahələr üzrə yüksək ixtisaslı mütəxəssislərin hazırlanması məqsədi ilə Azərbaycan Prezidenti İlham Əliyevin 2007-ci il 16 aprel tarixli Sərəncamı ilə təsdiq edilmiş “2007- 2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”na müvafiq olaraq xarici ölkələrin təhsil müəssisələrində bakalavr dərəcəsi almaq üçün gənclərin seçimi ilə əlaqədar müsabiqə keçirilməsi nəzərdə tutulur.
Gənclərin xaricdə təhsili ilə bağlı bütün xərclər dövlət tərəfindən ödənilir.
Ali məktəblərə sənəd qəbulu bu qaydada aparılacaqdır: orta, orta ixtisas və ya peşə məktəbini 2007-ci ildə bitirən abituriyentlər sənədlərini iyunun 25-dən iyulun 5-dək hər gün (şənbə və bazar günləri də daxil olmaqla) saat 9-dan 17-dək aşağıda göstərilən ünvanlarda təşkil olunan sənəd qəbulu komissiyasına (SQK) təqdim edirlər:
Bakı şəhərində - Azərbaycan və rus bölməsi üzrə: Binəqədi rayonunda - 83, 246, 284 nömrəli, Xətai rayonunda - 95, 55, 249 nömrəli, Nəsimi rayonunda - 19, 46 nömrəli, Səbail rayonunda - 190, 49 nömrəli, Sabunçu rayonunda - 80, 75 nömrəli, Qaradağ rayonunda - 139 nömrəli, Əzizbəyov rayonunda - 183 nömrəli, Nizami rayonunda - 210, 250 nömrəli, Nərimanov rayonunda - 47, 178 nömrəli, Yasamal rayonunda - 158, 225 nömrəli, Suraxanı rayonunda - 85, 104 nömrəli məktəblər.
Doqquz şəhər və rayonda (Mingəçevir şəhərində (13 nömrəli məktəb), Bərdə (gənclər və idman idarəsi), Tərtər (6 nömrəli məktəb), Lerik (V.İbrahimov adına orta internat məktəbi), Beyləqan (uşaq-gənclər şahmat məktəbi), Saatlı (S.Vurğun adına 1 nömrəli məktəb), Quba (gənclər və idman idarəsi), Ucar (2 nömrəli orta məktəb) və Oğuz (gənclər və idman idarəsi) rayonlarında) ali məktəblərə sənəd qəbulu Gənclər və İdman Nazirliyinin vasitəsilə aparılacaqdır.
Digər rayonlarda (şəhərlərdə) isə abituriyentlər sənədlərini rayon (şəhər) təhsil şöbəsində yaradılmış sənəd qəbulu komissiyalarına təqdim edə bilərlər.
Kənd rayonlarından olan əvvəlki illərin məzunları yaşadıqları rayonların təhsil şöbəsində yaradılmış SQK-ya da sənəd verə bilərlər.
Orta, orta ixtisas və ya peşə məktəbini əvvəlki illərdə bitirən abituriyentlər sənədlərini iyunun 22-dən 30-dək hər gün aşağıda göstərilən ali məktəblərdə təşkil olunan SQK-ya təqdim edirlər.
Bakı şəhərində - Azərbaycan bölməsi üzrə: Azərbaycan Texniki Universiteti, Memarlıq və İnşaat Universiteti, Xəzər Universiteti, Azərbaycan Turizm İnstitutu, “Azərbaycan” Universiteti, Bakı Biznes Universiteti.
Rus bölməsi üzrə: Bakı Slavyan Universiteti, Azərbaycan Dillər Universiteti.
Digər şəhərlərdə (hər iki bölmə üzrə): Naxçıvan şəhərində - Naxçıvan Dövlət Universiteti, Sumqayıt şəhərində - Sumqayıt Dövlət Universiteti, Gəncədə - Azərbaycan Kənd Təsərrüfatı Akademiyası, Mingəçevir şəhərində Mingəçevir Politexnik İnstitutu, Lənkəran şəhərində Lənkəran Dövlət Universiteti.
Xarici ölkələrdə təhsil alan abituriyentlər sənədlərini TQDK-da yaradılmış SQK-ya təqdim edirlər. Gürcüstanda yaşayan azərbaycanlılar Qazax Şəhər Təhsil Şöbəsində, Rusiya Federasiyasının Dağıstan Respublikasında yaşayan azərbaycanlılar isə Qusar Rayon Təhsil Şöbəsində təşkil olunan SQK-da sənəd verə bilərlər.
Xüsusi qabiliyyət tələb edən ixtisasları seçən abituriyentlər iyunun 22- dən 28-dək seçdikləri ixtisasın aid olduğu ali məktəbdə qeydiyyatdan keçərək, qabiliyyət imtahanı verəcəyi komissiyanın ünvanını və imtahanların cədvəlini götürməlidirlər. Onlar iyunun 25-dən iyulun 3-dək cədvəl üzrə qabiliyyət imtahanları verməli, qabiliyyət imtahanları başa çatdıqdan sonra test imtahanında iştirak etmək üçün iyunun 28-dən iyulun 5-dək imtahan verdiyi komissiyanın yerləşdiyi ali məktəbdə yaradılmış SQK-da ərizə forması doldurmalıdırlar.
Azərbaycan Dəniz Akademiyasının ixtisaslarını və ya Milli Aviasiya Akademiyasının I qrup ixtisaslarını seçən əvvəlki illərin məzunları sənədlərini iyunun 22-dən 30‑dək, builki məzunlar isə iyunun 25-dən iyulun 5-dək bilavasitə həmin təhsil müəssisələrində təşkil olunan SQK-ya təqdim edirlər. Onlar həmin təhsil müəssisələrində xüsusi tibbi və psixoloji müayinədən keçirlər. Milli Aviasiya Akademiyasının I qrup ixtisaslarını seçənlər həm də xarici dil üzrə müsahibədən keçməlidirlər. Müayinə və müsahibədən müvəffəqiyyətlə keçmiş abituriyentlər ərizələrində bu ali məktəblərin müvafiq ixtisaslarını göstərmək hüququ qazanırlar.
Qəbul imtahanları Bakı və Naxçıvan şəhərlərində keçirilir.
Orta ixtisas təhsili məktəblərinə orta (11 illik) təhsil bazasından qəbul ali məktəblərin qəbul imtahanlarında toplanılan ballar əsasında aparılır.
Yalnız orta ixtisas məktəblərinə qəbul olunmaq istəyən abituriyentlər də mütləq ali məktəblərə qəbulla əlaqədar yaradılmış sənəd qəbulu komissiyalarına müraciət edib “Abituriyentin ərizəsi” formasını doldurmalı və ali məktəblərin imtahanlarında iştirak etməlidirlər. Bu abituriyentlər ərizə formasında ali məktəbin ixtisas qrupunu qeyd edir, lakin heç bir ali məktəb ixtisasını göstərmirlər.
Ali məktəblərə tələbə qəbulu elanı, qruplar üzrə ixtisas kodları, müsabiqə şərtləri və digər zəruri məlumatlar “Abituriyent” jurnalının 3-cü nömrəsində dərc olunmuşdur. Qəbulla bağlı bütün məlumatları, həmçinin TQDK-nın internet saytından (www.tqdk.gov.az) da əldə etmək mümkündür.