Tələbə Qəbulu üzrə Dövlət Komissiyasından AZƏRTAC-a bildirmişlər ki, ali məktəblərə tələbə qəbulu qaydalarının 9-cu bəndinə əsasən, respublikanın dövlət və qanunvericilikdə müəyyən olunmuş qaydada qeydiyyatdan keçmiş qeyri-dövlət ali məktəblərinin boş qalan qəbul planı yerlərinə tələbə qəbulu 2007-ci il iyulun 17-də, 22-də, 27-də və 31-də test üsulu ilə keçirilmiş imtahanlarda toplanmış ballar əsasında aparılır.

İmtahanların nəticələrinə görə ali məktəblərə qəbul olunmuş abituriyentlərin boş qalan yerlərə keçirilən müsabiqədə iştirak etmək hüququ yoxdur.

Ərizələrin qəbulu internet vasitəsi ilə avqustun 10-dan 20-dək aparılacaqdır. Bu müddət ərzində abituriyent TQDK-nın internet saytına (tqdk.gov.az/abitelave) daxil olub “Abituriyentin elektron ərizəsi” formasını doldurub təsdiq etməlidir.

Abituriyentlər elektron ərizə formasında ali məktəblərin boş qalan ixtisasları ilə yanaşı orta ixtisas məktəblərinin ixtisaslarının da kodlarını (bax: “Abituruyent” jurnalı №5) göstərə bilərlər. Abituriyent dövlət və qeyri-dövlət ali məktəblərinin və orta ixtisas məktəblərinin təhsil forması ödənişsiz və ödənişli olan 12-yə qədər ixtisas kodunu seçə bilər. İxtisas kodlarının sayı və ardıcıllığını abituriyent özü müəyyənləşdirir və o, müsabiqədən keçdiyi ixtisasların birincisinə yerləşdirilir.

İxtisas qrupundan asılı olaraq Azərbaycan bölməsində müsabiqədə iştirak etmə şərtləri aşağıdakı qaydadadır: I qrup ixtisaslarının boş qalan yerlərinin müsabiqəsində ümumi balı 200-dən az olmayan abituriyentlər iştirak edə bilərlər. Bu zaman abituriyentin ana dili, riyaziyyat, fizika və kimya fənlərindən topladığı nisbi balları 10-dan az olmamalıdır. II qrup ixtisaslarının boş qalan yerlərinin müsabiqəsində ümumi balı 250-dən az olmayan abituriyentlər iştirak edə bilərlər. Bu zaman abituriyentin ana dili, riyaziyyat, coğrafiya və xarici dil fənlərindən topladığı nisbi balları 10-dan az olmamalıdır. III qrupun ixtisaslarının boş qalan yerlərinin müsabiqəsində ümumi balı 250-dən az olmayan abituriyentlər iştirak edə bilərlər. Bu zaman abituriyentin XH altqrupunda ana dili, ədəbiyyat, tarix və xarici dil fənlərindən, DT altqrupunda isə ana dili, ədəbiyyat və tarix fənlərindən topladığı nisbi balları 10-dan az olmamalıdır. IV qrupun ixtisaslarının boş qalan yerlərinin müsabiqəsində ümumi balı 250-dən az olmayan abituriyentlər iştirak edə bilərlər. Bu zaman abituriyentin ana dili, fizika, kimya və biologiya fənlərindən topladığı nisbi balları 10-dan az olmamalıdır.

Ümumi balı 350 və daha çox olan abituriyentlərin müsabiqəyə buraxılmaları üçün onların fənlər üzrə cavablarına nisbi bal məhdudiyyəti tətbiq olunmur.

I, III və IV qrupların xüsusi qabiliyyət imtahanı tələb edən ixtisaslarının boş qalan yerlərinin müsabiqəsində qabiliyyət imtahanından məqbul alan və test imtahanından ən azı 100 bal toplayan abituriyentlər iştirak edə bilərlər (fənlər üzrə cavablara nisbi bal məhdudiyyəti qoyulmur). Müsabiqə abituriyentin test imtahanından topladığı ballar əsasında aparılır.

Azərbaycan Dəniz Akademiyasının və Milli Aviasiya Akademiyasının I qrup ixtisaslarını yalnız test imtahanlarından əvvəl müvafiq təhsil müəssisələrində xüsusi tibbi və psixoloji müayinədən keçmiş abituriyentlər seçə bilərlər.

Abituriyentlər ali məktəblərin boş qalan plan yerlərinin və orta ixtisas məktəblərinin ixtisaslarının müsabiqəsində iştirak etmək üçün «Abituriyentin elektron ərizəsi» formasını internet bağlantısı olan istənilən yerdən TQDK-nın saytına (www.tqdk.gov.az) daxil olub doldura bilərlər. Respublikanın bütün bölgələrinin poçt şöbələrində internetə giriş və pulsuz istifadə imkanı da yaradılmışdır. Bundan əlavə abituriyentlər aşağıdakı ali təhsil müəssisələrində də internetdən pulsuz istifadə edə bilərlər: Bakı Dövlət Universiteti, Azərbaycan Dövlət Mədəniyyət və İncəsənət Universiteti, Naxçıvan Dövlət Universiteti, Azərbaycan Kənd Təsərrüfatı Akademiyası (Gəncə ş.), Gəncə Dövlət Universiteti, Sumqayıt Dövlət Universiteti, Lənkəran Dövlət Universiteti, «Qafqaz» Universiteti, «Odlar Yurdu» Universiteti, Azərbaycan Beynəlxalq Universiteti, Mingəçevir Politexnik İnstitutu, Bakı Biznes Universiteti, Bakı Avrasiya Universiteti.

Qəbul qaydaları, müsabiqə şərtləri, qəbul aparılan ixtisaslar və digər zəruri məlumatlarla “Abituriyent” jurnalının 6-cı nömrəsində tanış olmaq mümkündür.