Alimlər tənhalıq genini aşkar ediblər
Bakı, 22 noyabr, AZƏRTAC
Çin alimləri insan psixologiyası məsələlərinə aydınlıq gətirməyə və müəyyən qrup insanlar arasında tənhalığın səbəbini müəyyənləşdirməyə çalışıblar. Sən demə, problemlərin bir hissəsini “tənhalıq geni” ilə izah etmək olar. Onun sahibləri başqalarına nisbətən 20 faiz daha çox həyatda tək qalırlar. AZƏRTAC xarici KİV-lərə istinadla xəbər verir ki, bu məlumatlar tələbələr arasından 600 könüllünün genetik materialının öyrənilməsi zamanı müəyyən edilib.
Alimlər 5-HTA1 geninin iki variasiyasını aşkar ediblər: “G” və “C” variantları. Tələbələrin anketinin tərtibi və psixoloji analizi göstərib ki, 5-HTA1 geninin “G” versiyasının sahibləri “C” versiyasının sahibləri ilə müqayisədə tənhalıqla daha çox üzləşiblər.
“G” versiyalı insanda xoşbəxtlik hormonu olan serotonin daha az əmələ gəlir. Onun azlığı bədbinliyə və ruh düşkünlüyünə, əsəbiliyə gətirib çıxarır. Sadəcə, belə insanlara sosial münasibətlər qurmaq çətin olur.
Söhbət hələlik insanın genetik aparatına müdaxilədən getmir. Alimlər öz həyatına daha müsbət yanaşmağı, yaxın və doğma insanlarla daha çox ünsiyyətdə olmağı məsləhət görürlər.
Bölmənin digər xəbərləri
