ALMANİYALI MÜĞƏNNİ SÜRƏKLİ OXUMAQDA DÜNYA REKORDUNU TƏZƏLƏMİŞDİR

15.11.2006 [13:20]
Çap et
A⁺ A^-

AZƏRTAC-ın xüsusi müxbiri xəbər verir ki, almaniyalı həvəskar pop musiqisi ifaçısı Hartmut Timin adı ikinci dəfə Ginnesin rekordlar kitabına yazılmışdır. O, yenidən fasiləsiz-sürəkli oxumaq yarışının qalibi olmuşdur.

Həvəskar müğənni Meklenburq-Forpommern federal əyalətinin Varen şəhərində “Ginnes günü” münasibətilə keçirilən ənənəvi sürəkli oxumaq yarışlarında cümə axşamı səhərdən başladığı çıxışını ara vermədən 59 saat 15 dəqiqə ifa etmiş, bu qələbəsi ilə Ginnesin kitabında adına yazılmış rekordu bir daha təzələmişdir.

Xatırladaq ki, almaniyalı həvəskar pop müğənnisinin adı ilk dəfə bu kitaba 2005-ci ildə yazılmışdı. Bar-kafe müğənnisi həmin il Varendə keçirilən sürəkli oxumaq yarışında 55 saat aramsız çıxış etmişdi. Amma bundan az sonra italiyalı müğənni növbəti yarışda 58 saat 15 dəqiqə nəticə ilə almaniyalı müğənninin adını Ginnesin kitabından çıxarmağa nail olmuşdu.

Almaniyalı müğənni bu dəfə italiyalı rəqibini 45 dəqiqə arxada qoyaraq adını Ginnesin kitabında bərpa etmişdir.