Bakı, 22 sentyabr, AZƏRTAC

Altıncı “Yüksəliş” müsabiqəsinin qaliblərindən biri də Azərbaycan Respublikası Mərkəzi Bankının Bank fəaliyyətinə nəzarət departamentində bölmə rəhbəri vəzifəsində çalışan Mətanət Rzazadədir. O, Azərbaycan Dövlət İqtisad Universitetində maliyyə ixtisası üzrə bakalavriat, Bakı Mühəndislik Universitetində isə maliyyə menecmenti ixtisası üzrə magistratura təhsili alıb.

Peşəkar fəaliyyətindən əlavə, səyahət etməyi, yeni yerlər, insanlar və mədəniyyətlərlə tanış olmağı sevən Mətanət Rzazadə üçün bu təcrübələr həm də yeni perspektivlər qazanmaq və onları həyatının müxtəlif sahələrində tətbiq etmək imkanıdır. O, “Yüksəliş” müsabiqəsində ikinci dəfə iştirak edib və bu dəfə qaliblər sırasında yer alıb.

Mətanət Rzazadə AZƏRTAC-a müsahibəsində “Yüksəliş” müsabiqəsində qalib gəlməsinə aparan yoldan, müsabiqənin ona qazandırdığı təcrübədən və planlarından danışıb.

- Mətanət xanım, siz səyahət etməyi sevirsiniz. “Yüksəliş”in ilk mərhələsindəki imtahana da səfərdə olarkən qatılmısınız. Həmin gün nələr baş verdi?

- Səyahət etməyi, yeni yerlər görməyi, yeni insanlarla tanış olmağı, yeni mədəniyyətləri kəşf etməyi sevirəm. Mən müsabiqədə iştirak üçün daha əvvəl qeydiyyatdan keçmişdim. Həmin vaxt rəfiqəmin magistraturanı bitirməsi ilə bağlı məzun mərasimində iştirak etmək üçün Avropaya getmişdim. Belə oldu ki, müsabiqənin ilk mərhələsi ilə həmin səfər eyni tarixlərə düşdü.

Əvvəl tərəddüd etdim ki, necə olacaq, özümlə kompüter aparmalıyam, internet olan yer tapacağammı, saat fərqi var və s. Amma sonra fikirləşdim ki, buna dəyər, mən getməliyəm. Orada rəfiqələrimi də razı saldıqdan sonra 1-2 saatlıq icazə aldım. Əslində, yarımfinal mərhələsinə qədər müsabiqədə iştirakımla bağlı heç kimə deməmişdim. Onları razı saldıqdan sonra bütün diqqətimi imtahana yönəltdim və beləliklə, səyahətdə olarkən müsabiqənin ilk mərhələsində iştirak etdim.

Yarımfinal mərhələsinə qədər müsabiqədə iştirakımla bağlı heç kimə deməməyim daha çox daxili bir razılaşma idi. İstəyirdim ki, təkcə müsabiqəyə və özümü sınamağa fokuslanım. Ətrafdan yaranan gözləntilərin yaratdığı psixoloji təzyiqi istəmirdim. Ona görə də fikirləşdim ki, nəticə yaxşı olsa, hamı bunu sonda bilsə, onlar üçün də xoş sürpriz olar.

- Özünüzü “Yüksəliş” müsabiqəsinin hansı mərhələsində daha çox sınanmış hiss etdiniz?

- Əslində, müsabiqə elə qurulub ki, ilk mərhələdən sonuncu mərhələyə qədər nəsə öyrənirsən və hansısa çətinliklə qarşılaşırsan. Amma ilk üç mərhələnin belə bir xüsusiyyəti var ki, siz imtahanları kompüter qarşısında verirsiniz və bilirsiniz ki, sizinlə birlikdə minlərlə insan iştirak edir. Onların kim olduğu, hansı sahədə və ya hansı regionda çalışdığı barədə məlumatınız olmur. Sadəcə iştirakçıları statistik rəqəm kimi görürsünüz.

Amma son iki mərhələdə - yarımfinal və finalda həmin insanları canlı qarşınızda görürsünüz, onlarla qrup şəklində yarışır və nə qədər ağıllı, təcrübəli, fərqli sahələrdə çalışan, həvəsli, motivasiyalı və ambisiyalı insanlarla bir yerdə olduğunuzu görürsünüz.

Burada artıq sadəcə iştirak etmirsiniz, yarış da aparırsınız. Həmin insanların arasında özünüzü göstərməli, fikrinizi deməli və özünüzü sübut etməlisiniz. Ona görə də düşünürəm ki, canlı iştirak olduğu üçün son iki mərhələ bizim üçün daha çox sınaq mərhələsi idi.

- Qalibiyyətdən sonra özünüzdə dəyişən bir xüsusiyyət oldumu? Məsələn, qərar vermək, risk etmək və ya özünüzə güvənmək baxımından.

-Əslində, qalib olandan sonra yox, elə müsabiqənin yarımfinal və final mərhələləri məni əvvəllər heç qarşılaşmadığım situasiyalarla üz-üzə qoydu. Heç görmədiyim dilemmalarla qarşılaşır, qərarlar verməli olurdum. Bunun üçün müxtəlif keyslər hazırlanmışdı.

Yarımfinalın ikinci günündən çıxanda düşündüm ki, mən özüm haqqında nə qədər yeni informasiya əldə etmişəm. Özümü güclü hesab etdiyim tərəflərdə belə, deməli, nə qədər inkişaf etdirməli olduğum məqamlar var imiş. Eyni zamanda, heç bilmədiyim güclü tərəflərimlə də qarşılaşdım.

Yarımfinaldan çıxanda düşündüm ki, qalib olmasam belə, bu müsabiqə mənim özüm haqqında xeyli fikir formalaşdırmağıma kömək edib.

- Siz həm peşəkar fəaliyyətinizi, həm də ailə həyatınızı bir arada aparırsınız. Bir yaşında qızınız da var. Müsabiqəyə hazırlaşarkən iş, ailə və hazırlıq arasında balans yaratmaq çətin olmadı?

- Mənim bir yaşında qızım var. Bu yaşda uşaqlar daha çox diqqət və qayğı tələb edir. Eyni zamanda, mən çox məsuliyyət tələb edən bir sahədə çalışıram. Amma mən bunlara məhdudlaşdırıcı element kimi baxmıram. Əksinə, bunlar həm motivasiya mənbəyimdir, həm də bacarıqlarımı və səriştələrimi təkmilləşdirən vasitələrdir.

Mən məsuliyyət tələb edən bir sahədə çalışıram. Verdiyim qərarlar yalnız öz fəaliyyətimə aid deyil, ölkənin maliyyə sabitliyinə, hətta sıravi insanların həyat tərzinə təsir edə biləcək qərarlardır. Ona görə də məsələnin bütün tərəflərini nəzərə alaraq uyğun qərarlar verməliyik. Bu, “Yüksəliş” müsabiqəsində də sınanan məsələlərdən biri idi.

Qızıma gəldikdə isə, o mənim əsas motivasiyamdır və ondan öyrəndiyim çox şey var. Ən birincisi, vaxtı səmərəli idarə etməyi və prioritetləri düzgün müəyyənləşdirməyi öyrənmişəm. Əvvəlki kimi boş vaxtım yoxdur və artıq vaxtın qədrini daha çox bilirəm. İstər “Yüksəliş” müsabiqəsində, istər işdə, istərsə də başqa məsələlərdə bu, özünü göstərir.

Bir də qızım mənə az informasiya ilə böhran anlarını idarə etməyi, çevik qərar verməyi öyrədib. Bu da işimdə mənə çox kömək edir. Eyni zamanda, müsabiqənin son mərhələlərində xüsusilə məhdud vaxt verilir və həmin vaxt ərzində məsələni həll etməlisiniz. Amma bütün məlumatlar sizdə olmur, məlumatlar məhdud olur.

Düşünürəm ki, həm iş həyatında, həm də şəxsi həyatda qazandığımız bütün bu təcrübələr “Yüksəliş” müsabiqəsinin demək olar ki, bütün mərhələlərində mənə kömək etdi.

- Səyahətlər zamanı qazandığınız təcrübələr “Yüksəliş”də sizə necə kömək etdi?

- Sözün düzü, mən səyahətə yalnız hobbi kimi baxmıram. Düşünürəm ki, səyahət də təhsil kimi insanı dəyişdirən, təkmilləşdirən və inkişaf etdirən amillərdən biridir.

Hətta ezamiyyət səfərlərində mənimlə eyni işi görən insanların eyni məsələyə münasibətinin tamamilə fərqli olduğunu görürəm və onlardan öyrəndiyim çox şey olur. Eyni hal turizm səfərlərində də yaşanır. Çox sevirəm ki, səyahətlərdən özümlə yeni perspektivlər gətirim və onları həyatımın müxtəlif sahələrinə tətbiq edim.

Bundan başqa, səyahətlər zamanı heç tanımadığın insanlarla dil tapmalısan. “Yüksəliş” müsabiqəsində də bu bacarıq tətbiq olunur. Siz bir az əvvəl tanış olduğunuz insanlarla az sonra komanda olmalısınız. Eyni zamanda, fərqli mühitə çevik şəkildə uyğunlaşmalısınız. Bu da “Yüksəliş” müsabiqəsində sınanan məqamlardan biri idi. Düşünürəm ki, bunları uğurla tətbiq edə bilmişəm.

- Qaliblərə təqdim olunan 20 min manatlıq pul mükafatı var. Maraqlıdır, siz bu mükafatı hansı istiqamətdə dəyərləndirməyi düşünürsünüz?

- Sözün düzü, əvvəlcədən bununla bağlı dəqiq bir planım yoxdur. Amma düşünürəm ki, məni inkişaf etdirən və eyni zamanda sevdiyim bir istiqamətə xərcləyəcəyəm. Şəxsi inkişaf, beynəlxalq təlimlər, səyahət və ya bunları birləşdirən ümumi bir investisiya edə bilərəm. Yəni bu vəsaiti məntiqli və faydalı şəkildə dəyərləndirməyi düşünürəm.