AMEA-da süni intellekt alətləri ilə: Memar Əcəmi rəqəmsal dünyada canlandı
Bakı, 30 iyun, AZƏRTAC
AMEA Gəncə bölməsinin rəqəmsallaşma və süni intellekt şöbəsinin müdiri Fərhad Mirzəyev tərəfindən süni intellekt texnologiyalarından istifadə edilərək unikal rəqəmsal layihə ərsəyə gətirilib.
Şərq memarlıq məktəbinin banisi, dahi sənətkar Memar Əcəmi Əbubəkr oğlu Naxçıvani süni intellekt vasitəsilə vizuallaşdırılaraq canlandırılıb.
Bu barədə AZƏRTAC-a AMEA-dan məlumat verilib.
Videoçarxda dahi memarın obrazı, onun səs tonu və hərəkətləri müasir texnologiyaların köməyi ilə yüksək dəqiqliklə bərpa olunub. Süni intellekt tərəfindən səsləndirilən mətndə Memar Əcəminin dilindən onun ömür yolu, sənət fəlsəfəsi, həmçinin xalqımıza bəxş etdiyi Möminə Xatun və Yusif ibn Küseyr türbələri kimi ölməz abidələrin yaranma tarixi nəql olunur. Videoda sənətkarın “Biz gedərik, dünya qalar; biz ölərik, bu əsər xatirə qalar” fikri fəlsəfi tamaşaçıya dillə çatdırılır.
Layihənin müəllifi Fərhad Mirzəyev bildirib ki, bu cür rəqəmsal layihələrin məqsədi tariximizi müasir texnologiyaların dili ilə gənclərə sevdirmək və Azərbaycan elminin rəqəmsal potensialını nümayiş etdirməkdir. Süni intellektin imkanlarından istifadə etməklə tarixi şəxsiyyətlərin bu formatda təqdimatı həm təhsil, həm də mədəniyyətimizin təbliği baxımından böyük əhəmiyyət kəsb edir.
Qeyd edək ki, layihə AMEA Gəncə Bölməsində rəqəmsal texnologiyaların və süni intellekt sistemlərinin tətbiqi sahəsində görülən məqsədyönlü işlərin davamıdır.
Bölmənin digər xəbərləri
