AMEA-nın müxbir üzvü: Süni intellekt insan faktorunu tam əvəz edə bilməz
Bakı, 15 may, AZƏRTAC
Müasir texnologiyalar sürətlə inkişaf edir və bu proses cəmiyyətin bütün sahələrinə dərin təsir göstərir. Rəqəmsallaşma və intellektual sistemlərin genişlənməsi informasiya mühitini köklü şəkildə dəyişdirir. Süni intellekt isə bu transformasiyanın ən mühüm mərhələlərindən biri kimi çıxış edir.
AZƏRTAC xəbər verir ki, bunu Elm və Təhsil Nazirliyi İnformasiya Texnologiyaları İnstitutunun şöbə müdiri AMEA-nın müxbir üzvü Ramiz Alıquliyev deyib. O bildirib ki, süni intellekt yaxın gələcəkdə əmək bazarında ciddi transformasiyalar yaradacaq, bəzi peşələrin aktuallığını azaldacaq, eyni zamanda, yeni ixtisasların meydana çıxmasına səbəb olacaq. Xüsusilə təkrarlanan və standart əməliyyatlara əsaslanan sahələrdə avtomatlaşdırma sürətlənəcək.
“Süni intellekt insanın duyğularını, emosional qərarvermə qabiliyyətini tam şəkildə modelləşdirə bilmir. Məhz bu məhdudiyyətlərə görə süni intellekt bütün sahələrdə insan faktorunu tam əvəz etmək imkanına malik deyil və bir çox peşələrdə insanın yaradıcı və emosional rolu hələ də həlledici olaraq qalır”, - deyə alim bildirib.
R.Alıquliyev qeyd edib ki, buna baxmayaraq, təhsil, psixologiya, səhiyyə, incəsənət, idarəetmə və sosial kommunikasiya kimi sahələrdə insan amili əsas olaraq qalacaq. Çünki bu peşələr yalnız texniki bilik deyil, həm də emosional zəka, intuisiya, etik məsuliyyət və sosial münasibətlərin düzgün qurulmasını tələb edir.
Bölmənin digər xəbərləri
