Amerika mütəxəssisləri müəyyən etmişlər ki, tez hazırlanan əriştə şəkər və ürək xəstəliklərinin səbəbidir
Bakı, 16 avqust (AZƏRTAC). Beylor Universitetinin (Texas, ABŞ) mütəxəssisləri müəyyən etmişlər ki, əriştədən müntəzəm istifadə edilməsi kardiometabolik sindromun inkişafına gətirib çıxarır. Bu, ürək-damar, şəkərli diabet xəstəliklərində özünü büruzə verir. Asiyada tez hazırlanan əriştə daha populyardır. Cənubi Koreyada tibb işçiləri öz pasiyentləri arasında şəkərli diabet və stenokardiya diaqnozlarını daha tez-tez müəyyən edirlər. Bu xəstəliklər piylənmənin və düzgün həyat tərzi keçirilməməsinin nəticələridir. Şəkərli diabetin olması insan ömrünü xeyli azaldır və metabolik, damar pozğunluqlarından vaxtsız ölümə gətirib çıxarır.
AZƏRTAC “Science World Report” jurnalına istinadən xəbər verir ki, tibb işçiləri əriştənin həftədə iki dəfədən çox istifadə olunmasını məsləhət görmürlər. Bu ərzağın iki təhlükə faktoru vardır. Birincisi, acı ədviyyat və əriştənin özünün kaloriliyidir. Tez hazırlanan əriştədən müntəzəm istifadə edən insan acı ədviyyatdan asanlıqla qastrit və karbohidrat çoxluğundan diabet xəstəliklərinə tutula bilər. İkinci faktor əriştənin dəmə vurulduğu plastik qabdır. Plastik kütlə ilə qaynar suyun reaksiyasından insan orqanizminə ziyan vuran təhlükəli birləşmələr əmələ gəlir.
Həmçinin qeyd etmək lazımdır ki, qadınlar arasında xəstəliyə tutulma riski kişilərinkindən iki dəfə yüksəkdir. Yəqin ki, bu, həzm sisteminin zəif olması və potensial təhlükəli ərzaqları həzm edə bilməməsi ilə bağlıdır.
Bölmənin digər xəbərləri
