ANAMA-NIN DİREKTORU BEYNƏLXALQ TƏDBİRLƏRDƏ İŞTİRAK ETMİŞDİR
Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) direktoru Nazim İsmayılov ABŞ Tədqiqatlar Mərkəzinin təşkilatçılığı ilə Sloveniyada mina sahələrinin ləğv edilməsi, yəni mina təhlükəsi olmayan ərazilərin müasir üsullarla yoxlanılaraq təhvil verilməsi ilə bağlı keçirilən işçi iclasında iştirak etmişdir.
ANAMA-dan AZƏRTAC-a bildirmişlər ki, tədbir Marşall İrsi İnstitutunun, ABŞ Dövlət Departamentinin silahların məhv edilməsi ofisinin, BMT İnkişaf Proqramının və mina təmizləmə fəaliyyəti üzrə bir sıra QHT-lərin nümayəndələri daxil olmaqla, müxtəlif mina aksiyaları üzvlərindən ibarət olan “Big Bang Research” Məsləhətçi Şurasının təşəbbüsü ilə keçirilmişdir.
Bundan əlavə, ANAMA-nın direktoru Nazim İsmayılov Sloveniyada keçirilən “Mina Əməliyyatları üzrə Milli Direktorlar və BMT Məsləhətçilərinin 11-ci beynəlxalq görüşü”ndə iştirak etmişdir.
Görüş BMT-nin mina aksiyaları üzrə xidmətinin təşkilatçılığı, Sloveniya Beynəlxalq Etimad Fondunun və Xorvatiyanın Mina Fəaliyyəti üzrə Mərkəzinin dəstəyi ilə keçirilmişdir.
Görüşdə mina təmizləmə mərkəzlərinin direktorları, BMT-nin rəsmi nümayəndələri, beynəlxalq təşkilatların və qeyri-hökumət təşkilatlarının nümayəndələri, donor ölkələrin ekspertləri iştirak etmişlər.
BMT-nin bu mühüm tədbiri mina probleminə məruz qalmış bütün ölkələrin mina təhlükəsi ilə mübarizə üzrə milli direktorları və BMT məsləhətçilərinin təcrübə və mina aksiyaları sahəsində problemlərin mübadiləsinə həsr edilmişdir.
Bölmənin digər xəbərləri
