“Andlılar məhkəməsi - Azərbaycan təcrübəsində” mövzusunda “dəyirmi masa” keçiriləcəkdir
Bakı, 17 noyabr (AZƏRTAC). “Demokratik İslahatçı Gənclər” İctimai Birliyi noyabrın 25-də “Andlılar məhkəməsi - Azərbaycan təcrübəsində” mövzusunda “dəyirmi masa” keçirəcəkdir.
İctimai Birlikdən AZƏRTAC-a verilən məlumata görə, tədbir “Andlılar Məhkəməsinin yaradılması ilə bağlı beynəlxalq təcrübə və vətəndaş cəmiyyəti ilə qanunverici orqanın dialoqunun təşkili üçün ictimai müzakirənin keçirilməsi” layihəsi çərçivəsində reallaşacaqdır.
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə keçiriləcək “dəyirmi masa”da “Andlılar məhkəməsi beynəlxalq təcrübə-Azərbaycan” adlı kitabın təqdimatı da keçiriləcəkdir. Kitabda 30-dək ölkənin andlı məhkəmələri ilə bağlı təcrübəsi, təkmilləşmə dövrü, qanunverici orqanları barədə məlumatlar əks olunmuşdur.
Azərbaycanda andlı məhkəmələri ilə bağlı təsisatlar yeni, bu məhkəmələrin işləmə mexanizmləri haqqında ictimaiyyətdə məlumat az olduğundan kitab hüquqi terminlərdən az istifadə edilməklə, hər kəsin başa düşdüyü dildə hazırlanmışdır.
Bölmənin digər xəbərləri
