ANGELA MERKEL AZARKEŞLƏR KLUBUNUN FƏXRİ ÜZVÜ OLACAQDIR

18.11.2006 [17:51]
Çap et
A⁺ A^-

AZƏRTAC Röyterə istinadla xəbər verir ki, Almaniyanın federal kansleri Angela Merkel 2007-ci ilin əvvəllərində Kottbus şəhərinin “Energi” futbol komandası azarkeşlərinin rəsmi klubunun fəxri üzvü olacaqdır.

“Energi”nin prezidenti Ulrix Lepş etiraf etmişdir ki, Merkelin komandanın rəsmi azarkeşlərindən biri olması onun klubu üçün böyük şərəfdir.

Ölkə kanslerinin azarkeşlər klubuna rəsmən daxil olması mərasimi gələn ilin əvvəllərində “Energi”nin öz meydanında görüşlərindən biri ərəfəsində keçiriləcəkdir.

Keçmiş Almaniya Demokratik Respublikasında boya-başa çatan Merkel demişdir ki, Kottbus Almaniyanın şərq hissəsindəki bütün vilayətlər üçün nümunə olmalıdır.

O ki qaldı “Energi”yə, hazırda o, birinci bundesliqanın çempionatında 9-cu yerdədir.

Maraqlıdır ki, Almaniyanın sabiq federal kansleri Gerhard Şröder Dortmundun “Borussiya” komandası azarkeşləri rəsmi klubunun fəxri üzvü olmuşdur.