ARIÇILIQ ÜZRƏ DAMAZLIQ TƏSƏRRÜFATI YARADILMIŞDIR

04.12.2006 [05:35]
Çap et
A⁺ A^-

AZƏRTAC-ın müxbiri xəbər verir ki, arıçılıq son illər İsmayıllı rayonunda nəzərəçarpacaq dərəcədə inkişaf edir. Hazırda burada 3 mindən çox arı ailəsi bəslənilir. Bu, bir il əvvəlkindən 277 ailə çoxdur. Son bir ildə bal istehsalı da 4 min 155 kiloqram artaraq 45 min 225 kiloqrama çatmışdır.

Rayonda peşəkar arıçıların sayı getdikcə çoxalır. Tircan kəndində İslam Fətullayevin başçılığı ilə arıçılıq üzrə özəl damazlıq təsərrüfatı yaradılmışdır. İndi təsərrüfatda 100 arı ailəsi vardır. Burada əsasən Boz Qafqaz arı cinsi yetişdirilir. Bu arılar xəstəliklərə davamlılığı və daha yüksək məhsuldarlığı ilə seçilir. 7,2 millimetrlik xortumu və uzun ayaqları onlara çiçəklərdən daha asan şirə çəkməyə imkan verir. Boz Qafqaz cinsindən olan arı ailələri adamlarla mehriban və sakit davranışı, qışlamaya davamlılığı ilə də fərqlənir.

Damazlıq təsərrüfatında arı ailələrinin sayının yaxın illərdə 3-4 dəfə artırılması nəzərdə tutulmuşdur.