Arkadi Dvorkoviç: Şahmatın Olimpiadaya daxil edilməsi ölüm-dirim məsələsi deyildir
Bakı, 23 avqust, AZƏRTAC
Mərakeşdə XII Afrika Oyunları keçirilir. Burada ənənəvi idman növləri arasında şahmat seçilir. Avqustun 24-də başlayacaq yarışlarda 5 dəst medal oynanılacaq. AZƏRTAC xəbər verir ki, Beynəlxalq Şahmat Federasiyasının (FIDE) prezidenti Arkadi Dvorkoviç TASS agentliyinin müxbiri Andrey Kartaşova müsahibəsində şahmatın Oyunların rəsmi proqramına necə daxil edilməsindən, onun Olimpiada proqramına salınması perspektivlərindən və FIDE-nin inkişaf vektorlarından danışıb.
-Yəqin ki, şahmatı Oyunların rəsmi proqramında görmək bir çoxları üçün təəccüblüdür?
-Seçkiqabağı kampaniya zamanı hamı mənə “Şahmat Olimpiya Oyunları proqramına daxil ediləcəkmi, bunu necə etmək lazımdır?” sualını verirdi. Mən də həmişə standart cavab verirdim. Mən indi də həmin strategiyaya uyğun hərəkət edirəm. Əvvəlcə şahmat idman növü kimi bütün ölkələr tərəfindən tanınmalıdır. İndi dünya ölkələrinin təqribən üçdəiki hissəsi bunu edib. Biz şahmatın idman növü kimi dünyanın bütün ölkələri tərəfindən tanınmasına doğru addım-addım irəliləyirik. İkinci hissə şahmatın bütün kontinental oyunlarda, o cümlədən Afrika, Asiya, Panamerika və Avropa oyunlarında iştirakıdır. İndi biz şahmatın dörd kontinental oyunlardan ikisinin - Afrika və Asiya oyunlarının proqramlarına daxil edilməsinə nail olmuşuq.
-Şahmatın Olimpiada proqramına salınması iddialı məqsəddirmi?
-Əslində, şahmatın Olimpiada proqramına daxil edilməsi ölüm-dirim məsələsi deyil. FIDE üçün əsas məqsəd də deyil. Bununla belə, həm bizim, həm Beynəlxalq Olimpiya Komitəsi üçün müsbət məqam ola bilər. Lakin bunun üçün müəyyən zəmin hazırlamaq lazımdır.
-Bəs Avropa və Panamerika oyunları barədə nə deyə bilərsiniz?
-Hələlik razılığa gələ bilməmişik, lakin bunun üçün perspektiv var. Əslində, vaxtilə şahmat həm Afrika Oyunlarının, həm də Asiya Oyunlarının proqramlarında olub, lakin sonra çıxarılıb. Mərakeş Oyunları bu fasilədən sonra ilk qaranquşdur. Şahmat həm rəsmi proqramda, həm də medal hesabında olacaq. İstər şəxsi, istərsə də komanda hesabında sürətli şahmat, rapid və blits yarışları keçiriləcək.
-Yarışlarda neçə ölkə iştirak edəcək?
-Biz Afrika ölkələrinin təqribən yarısını gözləyirik. Son məlumatlara görə, 23-24 komanda təmsil olunacaq, 5 dəst medal oynanılacaq.
-Yarışların səviyyəsi barədə nə deyə bilərsiniz?
-Bütövlükdə kontinental oyunlar bununla fərqlənir ki, idmanın müxtəlif növlərində idmançıların prioritetlərindən və turnir cədvəllərindən asılı olaraq müxtəlif səviyyə müşahidə olunur. Elə idman növləri var ki, orada ən güclü idmançılar təmsil olunurlar, elə idman növləri də var ki, ikinci heyətlər iştirak edir. Biz bunu Avropa Oyunlarının nümunəsində gördük. Lakin məhz şahmatda biz yüksək səviyyəli idmançıların iştirakını gözləyirik, hərçənd Afrikanın aparıcı ölkəsi - Misir barədə danışsaq, o, həmişə bir neçə heyətlə çıxış edə bilər. Amma düşünürəm ki, məhz misirlilər optimal heyətlə təmsil olunmayacaq. Lakin qalan yığmaları aparıcı oyunçuları təmsil edəcək. Obyektiv olsaq, Misir şahmat məktəbi güclü olduğu üçün məhz bu ölkənin müvəffəqiyyət qazanmaq şansı daha yüksəkdir.
-Mərakeşdə şahmat turnirinin keçirilməsinə necə şərait yaradılıb?
-Biz hər gün mərakeşli həmkarlarla əlaqə saxlayırıq. Hər şey hazırdır, hərçənd həll olunası bəzi məsələlər qalır. Lakin bu, hər hansı idman növü üzrə bu cür iri yarışlar üçün normaldır. Turnirə maraq böyükdür, çünki şahmatla məhz Afrikanın şimalında çox maraqlanırlar. Mərakeş də istisna deyildir. Turnir çərçivəsində istər Mərakeşin, istərsə də bütövlükdə Afrika qitəsinin idman rəhbərləri ilə bir neçə görüş planlaşdırılıb. Turnirin çox yüksək səviyyədə keçiriləcəyini gözləyirik. Əminik ki, onu qlobal göstərə biləcəyik. Partiyalar internetdə birbaşa yayımlanacaq. Bunun üçün hər cür şərait yaradılıb.
-Siz dediniz ki, Asiya Oyunları ilə də razılığa gəlmisiniz, şahmat bu Oyunlarda da təmsil olunacaq.
-Bəli, gələn il Asiya Oyunları faktiki olaraq bu formatda keçiriləcək. Hazırlaşmaq üçün bir neçə ayımız var. Bu da Afrika Oyunlarına hazırlaşdığımız vaxtdan çoxdur. Çünki Afrika Oyunları ilə bağlı qərar son anda qəbul edildi. Biz gedən qatara bir növ son anda atılıb minə bildik. Asiya Oyunları barədə qərar qabaqcadan qəbul edilib. Biz Çində keçiriləcək bu yarışa artıq hazırlaşırıq.
-Siz, həmçinin dediniz ki, Olimpiya Oyunlarının proqramına düşmək məqsəd deyil. Bəs indiki halda FIDE-nin prioritetləri nədir?
-Bir neçə vektor var. Birincisi, FIDE-nin rəsmi yarışlarının nüfuzunu artırmaqdır. Bunlar bizim öz Olimpiadamız, dünya çempionatı və digər kütləvi turnirlərdir. İkincisi, internetdə şahmatı inkişaf etdirməkdir. Şahmatçıların çoxu məhz internetdə oynayacaq. İndi biz bu mövzu üzərində işləyirik. Üçüncüsü, milli şahmat federasiyalarında şahmatı, habelə maarifləndirici şahmatı inkişaf etdirmək, mütəxəssislər hazırlamaqdır.
-İndi ki, söhbət Afrikadan düşdü, bir neçə kəlmə bu barədə danışa bilərsinizmi?
-Əlbəttə, Afrikada şahmatı inkişaf etdirmək də prioritetlərdən biridir. Orada hamıdan bir neçə addım irəlidə olan Misir var. Sonra orta səviyyəli 5-7 ölkə gəlir. İstəsələr, 5 il ərzində Misirə rəqib ola bilərlər. Daha 40 ölkə var ki, burada şahmatı inkişaf etdirmək çox zəhmətli işdir. Onlar bunu bilirlər. Bu ölkələrin inkişaf proqramları ilə biz birlikdə məşğul oluruq.
-Oktyabrın 23-dən noyabrın 3-dək Batumidə Avropa komanda çempionatı keçiriləcək. Sizcə, favorit kimdir?
-İstənilən kontinental, eləcə də dünya yarışlarında Rusiya favoritlər sırasında olur. Buna baxmayaraq, rəqiblər də güclüdür. Bunlar Azərbaycan, Ermənistan, Fransa, İngiltərə və bir sıra digər ölkələrin komandalarıdır. FIDE-yə gəldikdə isə Avropa Şahmat İttifaqı ən yaxın tərəfdaşımızdır. Təbii ki, biz çempionatı diqqətlə izləyəcəyik. FIDE ilə Avropa İttifaqı şahmatın inkişafına qarşılıqlı dəstək haqqında saziş imzalayıb.
Bölmənin digər xəbərləri
