“Aşıq Ələsgərin anım tədbirləri” layihəsi çərçivəsində ilk tədbir
Bakı, 14 iyun, AZƏRTAC
Naftalan şəhərində, Heydər Əliyev Mərkəzində Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Dədə Ələsgər Ocağı” İctimai Birliyi tərəfindən həyata keçirilən “Aşıq Ələsgərin anım tədbirləri” layihəsi çərçivəsində ilk anım tədbiri keçirilib. Tədbir Naftalan Şəhər İcra Hakimiyyətinin tərəfdaşlığı ilə baş tutub.
İctimai Birlikdən AZƏRTAC-a bildirilib ki, tədbirin məqsədi böyük el sənətkarı Aşıq Ələsgərin zəngin yaradıcılıq irsinin təbliği, onun sənət dünyasının geniş ictimaiyyətə, xüsusilə də gənc nəslə çatdırılması, Azərbaycan aşıq sənətinin və milli-mənəvi dəyərlərimizin yaşadılması olub.
Tədbirdə Naftalan Şəhər İcra Hakimiyyəti başçısının müavini, icra hakimiyyəti başçısı səlahiyyətlərini müvəqqəti icra edən Arzu Məmmədov Aşıq Ələsgər yaradıcılığına dövlət səviyyəsində göstərilən diqqət və qayğıdan danışıb. O, Azərbaycan Respublikasının Prezidenti tərəfindən 2021-ci ildə Aşıq Ələsgərin 200 illik yubileyinin qeyd olunması və Bakı şəhərində heykəlinin ucaldılması ilə bağlı imzalanmış sərəncamların böyük söz ustadının irsinə verilən yüksək qiymətin bariz nümunəsi olduğunu vurğulayıb.
Sonra “Dədə Ələsgər Ocağı” İctimai Birliyinin sədri, Aşıq Ələsgərin nəticəsi və layihənin rəhbəri Xətai Ələsgərli çıxışında ustad sənətkarın həyat və yaradıcılığından ətraflı bəhs edib, onun poeziyasının milli-mədəni dəyərlərimizin qorunması və gələcək nəsillərə ötürülməsində mühüm rol oynadığını söyləyib. O, Aşıq Ələsgərin şeirlərindən nümunələr səsləndirərək iştirakçılara sənətkarın zəngin irsini bir daha xatırladıb.
“Dədə Ələsgər Ocağı” İctimai Birliyinin İdarə Heyətinin üzvü Taleh Əliyev çıxışında “Aşıq Ələsgərin anım tədbirləri” layihəsi barədə geniş məlumat verib. O bildirib ki, layihə çərçivəsində keçiriləcək tədbirlər Aşıq Ələsgər irsinin təbliği və aşıq sənətinin yaşadılması istiqamətində mühüm əhəmiyyət daşıyır.
Növbəti çıxışlarda Aşıq Ələsgərin Azərbaycan xalqının mənəvi yaddaşında xüsusi yer tutduğu vurğulanıb. Ustad sənətkarın yaradıcılığının milli-mənəvi dəyərlərimizin qorunması və təbliği baxımından mühüm əhəmiyyət daşıdığını qeyd edilib.
Tədbirin bədii proqramla davam edib.
Qeyd edək ki, layihə çərçivəsində keçirilən tədbirlərin əsas məqsədi Aşıq Ələsgərin zəngin yaradıcılıq irsini geniş ictimaiyyətə tanıtmaq, gənc nəslin milli-mədəni dəyərlərə bağlılığını gücləndirmək və Azərbaycan aşıq sənətinin yaşadılmasına töhfə verməkdir. Layihə çərçivəsində növbəti tədbirlər Goranboy, Göygöl və Samux rayonlarında keçiriləcək.
Bölmənin digər xəbərləri
